Rusiye Cezalanğan halqlar birligi Qırımtatar halqı V Qurultayı 4-nci sessiyasınıñ delegatlarını hayırladı

21 Iyül 2012

21-22 iyül künleri Aqmescitte V Qurultaynıñ 4-nci sessiyası olıp keçti.

Qırımtatar halqı V Qurultayınıñ 4-nci sessiyasınıñ işinde 200 delegat, Ukrainada akkreditatsiya yapılğan elçiliklerniñ, halqara teşkilâtlar, Ukraina ve Qırım ükümeti, Amerika, Türkiye ve Romaniyadaki qırımtatar diasporasınıñ vekilleri faal iştirak ettiler.

Delegatlarğa hayırlav sözünen Rusiye Cezalanğan halqlar birliginiñ reisi Arkadiy Gorâyev muracaat etti.

“Rusiye Cezalanğan halqlar birligi içün qırımtatarlarnıñ aliy vekâletli organı olğan Qırımtatar halqı Qurultayında iştirak etmek büyük şereftir”, – dedi A. Gorâyev. Bunıñ kibi de o, qayd etti ki “HH asırda sürgün etilgen halqlarnıñ facialı taqdirleri ve SSSR kommunist rejimi tarafından yapılğan soyqırım qalmıq, qaraçay, çeçen, inğuş, balqar ve mesheti türk halqını öz milliy aqları içün küreşte birleştire”.

Arkadiy Gorâyevniñ bildirgenine köre, Rusiye Cezalanğan halqlar birligi Qırımtatar halqınıñ öz Vatanında aqlarını ğayrıdan tiklev, onıñ Ukrainada telükesizligini ve inkişafını teminlev meseleleri boyunca Meclisniñ Halqara forum keçirmek teşebbüsine tolusınen qoltuta.

“Qırımtatar halqınıñ Meclisi ögüne kommunist rejiminiñ cinayetlerini taqiqat etmek ve KPSS üzerinden “Nürnberg – 2” mahkemesini teşkil etmek vazifesini qoyğan “Avropa Hatıra ve Namus platforması”nıñ resmiy azası olğanına yürekten sevinemiz, – dedi Arkadiy Gorâyev.

Öz sözüniñ soñunda A. Gorâyev Qırımtatar halqı Meclisiniñ reisine hıtap eterek, “sabıq SSSRde sürgün etilgen halqlarnıñ taqdiri içün mesülietni de boynuna almaqnı” rica etti ve Qurultayğa ikmetli qararlar qabul etüv boyunca semereli çalışmaqnı tiledi.