Rus müstemlekesinde casuslıqqa qabaatlanğan ukrainalı öldi

08 Fevral 2023

İşğal etilgen Qırımda «casuslıq»qa qabaatlanğan, maküm etilgen ukrainalı Konstântın Şırinh Rusiyedeki Orenburh vilâyetiniñ Novotroyitske şeeriniñ 5. müstemlekesinde öldi, dep öz menbalarına atıf eterek Qırım uquq qorçalayıcı gruppası haber berdi.

– Konstântınnıñ, qalp hastalığı sebebinden, tibbiy yardımına ihtiyacı bar, amma onı almadı. Rus epishanelerinde bizim vatandaşlarımızğa tibbiy yardım bermeme – siyrek vaqialar degil, munazam ameliyattır. Onıñ ölümi içün mesuliyet, müstemlekeniñ memuriyeti astındadır. Tamam bunıñ içün Rusiyeniñ tutqanı Ukraina vatandaşlarını azat etmek içün mehanizmlerni tapıp qullanmaq kerek, çünki RFnıñ müstemlekelerindeki şartlar – ayatqa kerçek bir telükedir, – dep QUGnıñ başı Olha Skrıpnık qayd etti.

Şu anda müstemleke, Şırinhnıñ ölümini resmen tasdıqlamadı. QUGnıñ aytqanlarına köre, resmen taqiqat keçirilir.

Bir sene evel rus TFH bildirdi ki, Qırımda şiddetli rejimli müstemlekede 12 senege maküm etilgen ve «casuslıq»qa qabaatlanğan ukrainalı Konstântın Şırinhke üküm, qorçalayıcı tarafnıñ şikâyet bermege niyetine baqmadan, aqqını qazandı.

2021 senesi ekim ayında Rusiyeniñ kontrol etkeni Qırım Yuqarı makemesi, ukrainalı Konstântın Şırinhni şiddetli rejimli müstemlekede 12 senege maküm etti. Onı «casuslıq»qa qabaatladı.

Keçenlerde Rusiye Telükesizlik federal hızmeti bildirdi ki, işğal etilgen Qırımda «devlet sırrını aymağa şübelengen rus askeri»niñ qatılğanı «ukrain istihbarat-diversiya gruppası»nıñ iştirakçileri tutuldılar. Rus müessisesiniñ bilgilerine köre, «devlet hainligi ve casuslıq» cinaiy davaları açıldı.

Ukraina Mudafaa nazirliginiñ İBİn, Rusiyeniñ mahsus hızmetleriniñ Qırımda «ukrain istihbarat-diversiya gruppası»nıñ iştirakçileri»ni tutulmaları aqqında malümat «tarik» adlandırdı. Ukraina prezidentiniñ QMCde vekilligi, Qırımda «ukrain istihbarat gruppaları»nıñ tutulmalarını «qanunsız taqip» adlandırdı.

2021 senesi arman ayında Qırımda Şırinhniñ davasında ilk oturış keçirildi. O, qapalı şekilde edi. Oturışta maznun özüni yaramay duymağa başladı. O zaman advokat Dmıtro Dinzeniñ bildirmelerine köre, tedaviylev almaq içün Şırinh Aqmescitteki SİZOnıñ memuriyetine tibbiy yardım arizasınen bir qaç kere muracaat etti.