Rus apishanesinde siyasiy mabüs Eldar Kantımirov horlamalar çeke

15 Avgust 2023

“Qırım musulmanları davasında” 12 senege maküm etilgen qırımtatar siyasiy mabüsi Eldar Kantımirov, “küfür sözler ve millet belgisine ait olmasına duşmalıq köstergen ve insannıñ itibarını aşalağan ibareler”ni muntazam tarzda eşite. Qırım.Aqiqat bu aqqında yazdı.

Apayı Elvina Useinovanıñ sözlerine köre, Rfnıñ Ulânovsk vilâyetiniñ Dimitrovgrad şeerindeki 1-nci cezahaneniñ müdirniñ yardımcısı Valeriy Nazarkin özüne böyle areket yapmağa izin bere. Qadın, Rusiye Ceza qanunnamesine mücibi bütün mabüslerniñ nezaretçiler tarafından nezaketli munasebet körme aqqına saip olğanlarını qayd etti.

Useinova, apishane hadimleriniñ areketlerine qarşı şikâyet yolladı, çünki qırımtatarlarnı “millet ya da din belgisine köre muntazam tarzda aşalaylar”.

Rusiye makemesi Eldar Kantimirovnı 12 senege maküm etti. Adam, Rusiyede yasaqlanğan, amma Ukrayınada ve bir çoq ülkede sıñırsız areket etken «Hizb ut-Tahrir» teşkilâtınıñ faaliyetinde iştirak etkeninde qabaatlana.