Romaniya qırımtatar diasporası Türk-tatar demokratik birliginiñ yañı reisini sayladı ve Romaniya Parlamentine namzet kösterdi

25 Iyün 2012

2012 senesi iyün 23 künü Romaniyanıñ Köstence şeerinde yañı reis ve demokratik birlikniñ idare eyyetini saylamaq içün teşkil etilgen kongress olıp keçti. Kongress delegatları şu sene noyabr ayında Romaniyada parlament seçimleri olacağı munasebetinen parlamentke qırımtatar diasporasından namzet köstermek ve tasdiqlamaq kerek ediler.

Namzet devlet tarafından milliy azlıqlarnıñ vekillerine kvota sisteması boyunca berile.
Kongresste Türkiyeniñ Köstencede baş konsulı Füsun Aramaz, bunıñ kibi de Qırımtatar halqı Meclisiniñ azaları Ali Hamzin, Zaur Smirnov ve Qurultay delegatı Bekir Ğaniyev de bulundılar.

Kongress Romaniya, Türkiye ve qırımtatar milliy gimnlerniñ icrasından başlanıp, soñra Romaniya musulmanlarınıñ müftisi Murat Yusuf dua oqup, Kongressniñ işine muvafaqiyet tiledi. “Romaniya tatarlarınıñ faaliyeti Qırım ve qırımtatar halqımıznen birligimizni daa da qaviyleştirüvge doğrultılmaq kerek”, – dedi Murat Yusuf.

Kongress iştirakçilerini bunıñ kibi de Romaniya Türk-tatar demokratik birliginiñ reisi Varol Amet, Türkiyeniñ Köstencede baş konsulı Füsun Aramaz, bunıñ kibi de Qırımtatar halqı Meclisiniñ tışqı alâqalar bölüginiñ başı Ali Hamzin ve Meclis azası, Yalta şeer şurası milletlerara munasebetler ve migratsiya idaresiniñ başı Zaur Smirnov samimiy selâmladılar.

Ali Hamzin, Kongress delegatlarına Qırımtatar halqı Meclisiniñ reisi Mustafa Cemilevniñ, bunıñ kibi de Qırımdaki semetdeşlerniñ selâmlarını söylep, Meclis reisi Qırımda qırımtatar halqınıñ ğayrıdan tiklenüv ve pekinüvde Romaniya diasporasınıñ büyük hızmetini ayrıca qayd etkenini bildirdi.

Soñra Qırımtatar halqı Meclisi adından “Qırımtatar halqını birleştirüvge, qırımtatar halqınıñ öz tarihiy Vatanında ğayrıdan tiklenmesine doğrultılğan faaliyeti, Qırım ve Romaniya qırımtatar cemiyeti arasında alâqalarnı ğayrıdan tiklev işine qoşqan şahsiy issesi içün Romaniya Türk-tatar demokratik birlikniñ reisi Varol Ametke, Romaniya Türk-tatar demokratik birliginden Romaniya parlamentiniñ deputatı Aledin Amet, Türkiyeniñ baş konsulı Füsun Aramaz, Romaniya musulmanları müftisiniñ yardımcısı Murat Yusuf, Köstence valisiniñ yardımcısı Aydun Qurt-Molla, Romaniya Ükümeti Milletlerniñ işleri boyunca mesül kâtip yardımcısı Necat Sali, qadınlar teşkilâtınıñ reisi Sevim Mustafa, İsmail Gaspralı yaşlar teşkilâtınıñ reisi Dinçer Caferge beridi.

Kongresste Nicat Sali ve Aledin Ametniñ olmağanı sebebinden olarnıñ yarlıqları kâtibiyetke qaldırıldı.

Kongress programmasına muvafıq Romaniya Türk-tatar demokratik birlik reisi Varol Ametniñ esabatı diñleninldi. Romaniya Parlamenti deputatı Amet Aledinniñ maruzasını onıñ yardımcısı Ekrem Ğafar oqudı.

“Romaniya Türk-tatar demokratik birliginiñ maliyeviy faaliyeti aqqında” maruzasınen nezaret-maliye komissiyasınıñ reisi Turan Celâl çıqışta bulundı.
Çıqışlar neticeleri boyunca muzakerelerde maruzacılar delegatlarnıñ suallerine cevap berdiler. Soñra Faruq Memet reisliginde saylav komissiyası Romaniya Türk-tatar demokratik birliginiñ reisi ve Romaniya parlamentine namzet kösterüv işini başladı.

Romaniya Türk-tatar demokratik birliginiñ saylavlar boyunca nizamnamesine binaen saylavlar açıq ve demokratik şekilde ötkerildi. Saylavlar neticelerine köre Romaniya Türk-tatar demokratik birliginiñ reisi olaraq Celil Erecep ve Romaniya Türk-tatar demokratik birliginiñ adından Romaniya parlamentine Varol Ametniñ namzeti kösterildi.

Bunıñ kibi de Kongresste Romaniya Türk-tatar demokratik birliginiñ reisi Celil Erecepniñ teklifinen birinci muavin olaraq Samir Minan, baş kâtip Aydun Qurt-Molla, muavinler olaraq Demirel Qayali, Naci Celâl ve Birol İbadula delegatlar tarafından tasdiqlandılar.

Malümat içün:  Celil Esercep 2000-den 2008 senesine qadar Romaniya Parlamentiniñ “Ulu Romaniya” firqası adından Romaniya parlamentiniñ deputatı edi.