Mustafa Cemilevniñ Türkiyege iş ziyareti

25 January 2025

Türkiyeni ziyaret etken qırımtatar halqınıñ lideri, Ukraina halq mebusı Mustafa Cemilev Türkiye prezidentiniñ Baş mesleatçısı, Çetelde türk ve qomşu cemiyetleri birliginiñ (YTB) reisi ve TIKA vitse prezidentinen körüşti.

QIRIM.News Türkiye bürosı bunı bildirdi.

Çetelde türk ve qomşu cemiyetleri birliginiñ (YTB) reisi Abdullah Eren ile körüşkende Cemilev, Bolu rayonındaki Kartalkaya dağ kurortında yanğın vaqtında elâk olğanlarnıñ tuvğanlarına taziye bildirdi. Körüşüv vaqtında taraflar işğal etilgen Qırım ve qırımtatarlarnen bağlı vaziyetni ve Rusiye-Ukraina cenkiniñ al-azırdaki ketişatını muzakere ettiler.

Qara qış ayınıñ 23-nde Ankarada TIKA vitse prezidenti Mahmut Çevik ile körüşüv olıp keçti. Körüşüvde Qırımdaki vaziyet ve 2014 senesinden berli Rusiyeniñ işğali altında bulunğan qırımtatarlar, em de Rusiye-Ukraina cenki muzakere etildi. Bundan ğayrı, qırımtatarlarnı desteklemek içün TİKA leyhaları muzakere etildi.

Türkiye prezidenti Recep Tayyip Erdoğannıñ baş mesleatçısı Yalçın Topçu Mustafa Cemilev ile körüşkende, onıñ memleketi Rusiye-Ukraina cenkiniñ toqtatıluvına doğrultılğan bütün teşebbüslerge qoltuta, dep bildirdi.

Topçunıñ aytqanına köre, bu cenk eki memleket içün deşetli, bölge ve dünya içün adaletli ve devamlı barışıqnen yekünlenmek kerek.

O qoştı ki, Türkiye Qırımda yaşağan ya da işğalden soñ Qırımnı terk etmege mecbur olğan “qardaşları”nıñ aqlarını qorçalamağa devam etecek, em de cenkten zarar körgen ukrain halqınıñ aqlarını er alda qorçalaycaq.

Aynı zamanda Mustafa Cemilev bildirdi ki, 2022 senesi kiçik aynıñ 24-nden devam etken total cenk şaraitinde Ukraina ve Rusiye arasında barışıq halqara uquqqa uymaq kerek.

Körüşüvde Ukraina elçiliginiñ Ankaradaki mesleatçısı Denıs Zolotaröv, Qırımtatar Milliy Qurultayınıñ delegatı Şevket Usmanov, Türkiyedeki Qırım haberleri agentligi müdiri Esma Kasar, “Qırım ailesi” teşkilâtınıñ tesisçisi Anife Kurseitova, Qırımtatar tiliniñ inkişafı institutınıñ operativ müdiri Elvina Seytbullayeva, qırımtatar jurnalisti Gülsüm Halilova ve Türkiyedeki Evkaf Foundation fondunıñ temsilcisi Aliye Çıtak iştirak ettiler.