Riza Şevkiyev: «Balalarnı sportqa celp etüv – bugünde-bugün müim ve alicenap iştir»

08 Yanvar 2014

2014 s. Yanvar 8 künü Aqmescite “Kazaçye dvoyeborye” boyunca dünya çempionatınıñ ğaliplerine mukâfatlar berildi. Genç çempionlarnı elde etken muvafaqiyetlerinen “Qırım fondı” hayriye teşkilâtınıñ baş direktorı, Meclis azası Riza Şevqiyev hayırladı.

2013 senesiniñ soñunda Harkov şeerinde olıp keçken dünya çempionatında “Dülber” sport klubınıñ azaları 7 medal qazandılar – Timur Karametov ve Siyar Qadıyev tunç, Dannil Primak, Emil Topalov, Alan Saiydov ve Osman Babayev – kümüş, altın medalni ise qız bala Aleksandra Mitina elde etti.

Olarnıñ episi sportnıñ “Kazaçye dvoyeborye” adınen birleştirilgen çeşit şekillerinde – kikboksing, MMA, MixFight iştirak eteler.

“Men sizni mında selâmlamaqtan sevinç duyam, – dedi Riza Şevqiyev sportçılar, ana-babalar ve trenerlerine hıtap eterek. – Siziñ maşallañız bar, men siziñ ğalebe ve qazançlarıñıznen ğururlanam. Qırımtatar halqınıñ Meclisi ve “Qırım fondı” hayriye teşkilâtınıñ adından bu yüksek mukâfatlarıñıznen hayırlamağa isteyim. Riza Şevkiyev sportçılarnı fahriy yarlıqlar ve para mukâfatlarınen taqdirlep, tatlılarnen sıyladı.

“Keçken sefer biz balalarğa yarışqa barmağa yardım etken edik, bu sefer ise mukâfat ve bahşışlar berdik, – dey R. Şevqiyev. – Biz imkânımız olğanı qadar yardımcı olmağa tırışamız, epimiz azaçıq olsa da destek bersek, sezilirli bir yardım olur.

“Balalarnı sportqa celp etüv – bugünde-bugün müim ve alicenap iştir. Bu olarnı afyoncılıq ve hırsızlıq ilerilegen soqaqlardan çetleştirir”

Genç sportçılarnıñ treneri Nariman Selâmetov ise öz nevbetinde “Qırım fondı” hayriye teşkilâtınıñ baş direktorı, Meclis azası Riza Şevqiyevge qoltutuvı içün teşekkür bildirdi.