Rf ordusına mobilizatsiya etilgen qırımtatarlar arasında qurbanlar bar – Bariev

17 Noyabr 2022

“Ukrain Radiosı”na intervyü bergende Qırımtatar Milliy Meclisiniñ uquqiy meseleler ve tış işler idaresiniñ başı Eskender Bariev qayd etti ki, putinniñ bildirmelerine baqmadan işğal etilgen Qırımda mecburiy mobilizatsiya devam ete.

– Putinniñ mobilizatsiyanı bitirüv aqqında bildirmesine baqmadan Qırımda o alâ daa devam ete. Birinciden rf, Qırımnıñ tamır halqlarını mobilizatsiya etmege tırışa, ve BMTnıñ insan aqları beyannamesini ve ukrain qanunlarını boza, – dep o qayd etti.

Barievniñ sözlerine köre, rf ordusına mobilizatsiya etilgen qırımtatarlar aralarında endi qurbanlar bar. Olar iç bir kontrakt imzalamadılar, evlerinden mecburen alındılar ve “top eti” olaraq qullanıldılar, tamır halqlarından vatandaşlar bu cinayetlerniñ iştirakçileri olmağa istemeyler.