rf müstemlekesinde epis etilgen jurnalist Yesıpenko ruhiy basım astında buluna

10 Mayıs 2023

rusiyeniñ Ukrainağa tolu miqyaslı tecavuzınıñ başlanğıcından soñ Keriç 2. müstemlekesiniñ işçileri, jurnalist Vladıslav Yesıpenkonıñ areketleri ve sözlerine diqqatnen taqip eteler. Apayı Katerına bunı añlattı, dep Svoboda Radiosı haber berdi.

– Şimdi Vladıslavnen tik bir taraflı kommunikatsiya bar. Ayda eñ çoq bir kere telefon eter. Onıñ qorçalayıcısınen telefon subetleri, advokat sırrını bozğan müstemlekeniñ teftişçisinen beraber keçirler. 2022 senesi saban ayınıñ 24-ündeki sahte malümat aqqında rus qanunı sebebinden Vladıslavnen subetle vaqtında biz advokatnen bu cenkni cenk olaraq adlandırmamağa ve bu mevzunı muzakere etmemege tırışamız. Çünki añlaymız ki, yañlış bir cümle aytıp, aqayımnı müstemlekeniñ daa ciddiy şartlarınıñ ya da memuriy davanıñ sebebi ola bilir, – dep jurnalistniñ apayı añlattı.

Bundan ğayrı jurnalist qayd ete ki, epis etilgen başqa insanlar sanki onı közeteler ve “sözlerini diqqatnen diñlemege” tırışalar.

– Adam ayttı ki, deyerli er afta müstemlekeniñ memuriyeti onı yanına çağırıp, maña ve advokatına çoq şey aytamamasını tenbiyeler. Müstemlekeniñ reberligi, bizim  teşekerüv keçirecek Ombudsman ve uquq qorçalayıcılarğa hitap etececgimizden qorqalar, – dep Yesıpenkonıñ apayı qoştı.

2021 senesi saban ayınıñ 10-unda Radio Svobodanıñ “Qırım.Aqiqat” leyhasınıñ ştattan tış jurnalisti aqrabalarınen bağlanmağa toqtadı – bundan soñ belli oldı ki, rusiye TFH adamnı tuttı ve “ukrain mahsus hızmetlerinen bağ qurğanı” ve “bomba aletlerini saqlağanı ve ketirgeni” içün qabaatlandı.