Remzi İlyasovğa birinci dereceli devlet hızmetçisi unvanı berildi

30 October 2012

Ukraina Prezidenti Viktor Yanukoviç Qırımtatar halqı Meclisi reisiniñ muavini, Qırım Yuqarı Şurası Milletlerara munasebetler ve sürgün etilgen grajdanlarnıñ işleri boyunca daimiy komissiyasınıñ reisi Remzi İlyasovğa birinci dereceli devlet hızmetçisi unvanını berüv aqqında fermannı imzaladı.

Ferman “Devlet hızmeti aqqında” Ukraina Qanunınıñ 26-ncı maddesine binaen imzalandı.

Malümat içün: Remzi İlyasov 1958 senesi aprel 12-de Özbekistannıñ Ferğana şeerinde dünyağa keldi. Aliy malümatlı, 1983 senesi Tomsk şeerindeki müendislik-qurucılıq institutınıñ “Qurucılıq malzemeleri sanayısınıñ iqtisadiyatı ve teşkilâtlandırıluvı” bölügini bitirip, iqtisadiyatçı müendis zenaat saibi oldı.
2006 senesinden – Qırım Yuqarı Şurası Milletlerara munasebetler ve sürgün etilgen grajdanlarnıñ işleri boyunca daimiy komissiyasınıñ reisi

Qırımtatar halqı Qurultayınıñ (1991–1996 seneleor, 2001–2007 seneler, 2007 yılından bugünge qadar) delegatıdır.

Qırımtatar halqı Meclisiniñ erkânına üç kere saylandı.

2001 senesinden Qırımtatar halqı Meclisi reisiniñ muavini.

Ukrainada nam qazanğan iqtisadiyatçı. Qırım Yuqarı Şurasınıñ 2006–2010 seneleri çağırılışı, 2010 senesinden Qırım Yuqarı Şurasınıñ altıncı çağırılışınıñ deputatıdır.