Remzi İlyasov Ukraina Tış işleri nazirine qırımtatarlarnı yerleştirmege maliyeviy yardım kösterüvde halqara teşkilâtlar ve diasporanıñ rolü arasındaki farqnı añlattı

20 Sentâbr 2013

Sentâbr 19 künü Qırımda Ukraina Tış işleri naziri Leonid Kojara, Qırım Nazirler Şurası ve Meclis yolbaşçılarınıñ Avropa Birliginiñ Kenişletüv ve Avropanıñ eyiqomşulıq siyaseti meseleleri boyunca komissarı Ştefan Füle ile körüşüvi olıp keçti.

3 saat devam etken Qırımtatar halqı vaziyetiniñ muzakeresi çerçivesinde Meclis reisiniñ muavini, Qırım Yuqarı Şurasınıñ deputatı Remzi İlyasov körüşüv iştirakçileriniñ, olarnıñ sırasında devlet ve cumhuriyet akimiyetiniñ vekilleri de bar ediler, diqqatını şuña celp etti ki, qırımtatar halqınıñ qaytuvı ve yerleştirilmesini “soñuna kelmekte” ya da 2015 senesine qadar yekünlenir demek olmaz.

“Qırımtatarlarnıñ daa çoqtan-çoq meseleleri alâ daa çezilmedi, – dedi İlyasov. – Biz bunı köremiz ve eşitemiz. Bu meselelerni çezmek zarur ve biz olarnı çezüv yollarını tapmaq borclumız”.

Bundan da ğayrı, cumhuriyet vekilleriniñ sürgünlikten qaytqanlarnıñ problemlerini çezüvde halqara teşkilâtlarğa muracaatlarını izaatlayaraq Remzi İlyasov Ukraina Tış işleri naziriniñ diqqatını ukrain diplomatları bir qaç ay evelsi qırımtatar diasporasından Qırımda semetdeşlerine yerleşmege yardım bermeleri aqqında rica etkenlerine celp etti.

“Biz halqara vaquf ve teşkilâtlar vastasınen sermiya tapmağa azırmız, lâkin bu devlet idareleriniñ diasporağa yardım sorap muracaatları olmaması kerek, – diye yekün çekti sözlerine R. İlyasov.