Remzi İlyasov: «Qadınlarımıznıñ milliy terbiyesi, irade, cesareti ve vatanperverlikleri sayesinde Halqımız sürgünlikte sağ qalıp, Vatanğa qayttı»

22 April 2013

Kitapnıñ 2-nci cıltında özlerini milliy areket, sanat, ilim ve edebiyatqa bağışlağan qırımtatar qadınları aqqında ikâye etile. Olarnıñ arasında Saniye Ametova, Gülizar Yunusova, Zenife Komurci, Gülizar Abdullayeva, Milâra Settarova, Alyana Osmanova, Zarema Asanova, Şefiqa Haliqova, Safure Kacametova, Sevil Lâtif-zade, Ayşe Çabanova, Elmira Çerkezova, Aksana Amet-Mustafa, Naciye Ametova, Dilâra Qurtametova, Zure Pinka, Elvira Emir, Safiye Eminova, Emine Bekirova, Hatice Mamutova, Leylâ Kadırova, Gülnara Memetova, Lentara Halilova, rahmetli Zeynep Lümanova, rahmetli Cevaire Mecitova ve rahmetli Zeynep Appazova bar.

Kitapnıñ müellifi Lentara Halilovanıñ aytqanına köre neşir 1000 nushada basılıp, Qırımnıñ kütüphane, mektep ve universitetlerine dağıtılacaq. Tanıtım tedbiri 2-nci cılt azırlanmasınıñ teşebbüsçisi Qırımtatar qadınlar birleşmesiniñ reisi Safinar Cemilevanıñ qoltutuvında ötkerildi.

Tedbirde çıqışta bulunğan Milliy Meclis reisiniñ muavini Remzi İlyasov, “Krım” hayriye fondınıñ direktorı Riza Şevqiyev, Meclis prezidiumınıñ azası, milliy areket iştirakçisi Zevcet Qurtümerov tedbir teşkilâtçılarına minnetdarlıq sözlerinen muracaat etti.

Kitapnıñ qaramanlarına Meclis reisi Mustafa Cemilev adından Fahriy yarlıqlar berildi, Qırımtatar qadınlar birleşmesiniñ reisi Safinar Cemileva ise er bir qadınğa bahşış ve çeçekler berdi.

“Bu – “Qırımnıñ sadıq qızları” türküminiñ 2-nci kitabıdır. Birincisi 2004 senesi çıqqan edi, – dedi Lentara Halilova.- Kitapta Qırım içün milliy küreşte iştirak etken qadınlar aqqında laf yürsetile. İnanam ki, yaş nesil bu kitapnı oqup, anaları, bitalarından ibret alırlar”.

Lentara Halilova qırımtatar qadınlarına bağışlanğan bu türkümniñ mıtlaqa devamı olacağına işanğanını qayd etti. “Men kitapnıñ ğayesi içün Safinar Cemilevağa teşekkür bildirmek isteyim. Aynı bu qadın böyle kitap azırlamaqnı teklif etti, men ise jurnalist olaraq ğayeni kerçekleştirdim. Tabiiy ki, eñ büyük minnetdarlığımnı Meclis reisi Mustafa Cemilev ve Türkiyeniñ Ukrainadaki elçiliginde medeniyet meseleleri boyunca attaşesi Berat Yıldızğa bildirmekni borcum, dep sayam”, – dedi kitap müellifi.

Meclis reisiniñ muavini Remzi İlyasov kitap üzerinde çalışqanlarnıñ episine teşekkür sözlerini aytıp, qadınlarımıznıñ milliy terbiyesi, irade, cesareti ve vatanperverlikleri sayesinde halqımız sürgünlikte sağ qalıp, Vatanğa qayttı, dedi.

“Sürgünlikten qaytqanımıznıñ ilk yıllarında erkekler iş qıdırdılar, ev qurdılar, haqlarımıznıñ tiklenmesi içün areket ettiler, bütün bu vaqıtta siz olarnıñ yanlarında ediñiz, siziñ nazik omuzlarıñızğa ğayet ağır vazife yüklendi, – dedi Meclis reisiniñ muavini Remzi İlsâov. – Siz balalarımıznı milliy ruh ve adetlerimiz müitinde terbiyelemege tırıştıñız”.