Remzi İlyasov: «Milliy idare sistemini quruvımızdan baş maqsadımız onı quvetlendirmektir»

17 January 2013

2013 senesi yanvar 17 künü Aqmescitte olıp keçken matbuat konferentsiyasında Qırımtatar halqı Meclisi reisiniñ muavini Remzi İlyasov milliy idare sisteminiñ leyhası aqqında ayttı.

“Bu leyha VI çağırılış Qurultay delegatlarınıñ muzakeresine teklif etilecek, – dedi R. İlyasov.

– Eñ müimi, bu qurumda Qurultay-Meclisniñ bütün potentsialını işke qoymaq. Meselâ, 250 delegattan faqat 30 fayızı faal çalışıp, qalğanları çeşit sebeplerge köre öz faaliyetini amelge keçirip olamaylar. Mezkür sistemde deputat korpusını medeniyet, tasil, siyaset ve diger komitetlerge bölip, komitet içinde reisler saylanması közde tutula. Reisler avtomatik şekilde Qurultay Prezidiumına kirecekler”.

Bunıñ kibi de İlyasov, Qurultay alğan qararlarnı ömürge keçirecek Meclis azaları da saylanacaq. “Biz Qurultay reisini saylamaqnı teklif etemiz. Reis strategik meselelernen oğraşıp, Qurultay ve qırımtatar halqını temsil etecek.

Qurultay reisiniñ eki muavini olır, biri Meclis reisi vazifesini, ekincisi ise – Qurultay Prezidiumınıñ reisi vazifesini eda etecek, dep añlattı İlyasov. Onıñ qayd etkenine köre, Qurultay delegatları ve milliy idare sistemi bir yönelişte çalışacaq. “Milliy idare sisteminiñ leyhasını işlegenimizde, sistemni quvetlendirmek, semereli çalışmasına imkân yaratmaqnı tüşündik”, dedi Meclis reisiniñ muavini.

Böyle sistem ne derecede semereli olacağı aqqındaki sualge Remzi İlyasov iş sistem şekilde alınıp barılmasınıñ tarafdarı olğanını bildirdi. “Bir mesele ortağa çıqqanda onı añlamağan insanlar muzakere eteler.

Men ister edim ki, Qurultay-Meclis sisteminde çalışqan insanlarnıñ episi er angi meseleni çezmek iqtidarında olsunlar.

Epimiz şunı bilmelimiz ki, qarar alğan ve qararnı eda etken qurum mevcut. Qurultay yılda bir kere toplanmasını teklif etem, sessiyalar arasında ise Qurultay Prezidiumı çalışmalı”, – dep sözüni yekünledi R. İlyasov.