Remzi İlyasov: «Biz milliy bayrağımıznen ğururlanmaq kerekmiz»

27 June 2013

Bu bayramğa bağışlanğan kütleviy tedbirler 4 yıldan berli Milliy Meclis ve Bütündünya qırımtatarlar kongressiniñ qoltutuvında qırımtatar gençler teşkilâtları tarafından keçirilmekte.

Bayram tedbirleri çerçivesinde iyün 26 künü saba Qırım şeerleri boylap avtoyürüş başlandı. Arabalar sıranen Aqmescit-Bağçasaray-Aqyar-Foros-Simeiz-Yalta- Aluşta – Aqmescit şeerlerini keçip, Pobeda caddesinden yarımada paytahtına kirdi ve bayram ötkerilgen Trenöv parkı yanında toqtaldılar.

Olarnı gürdeli elçırpmalar ile qarşıladılar. Bayramda bulunğanlarğa sanadan Qırım musulmanlarınıñ müftisi acı Emirali Ablayev muracaat etip, er keske eyilik ve milliy iradeleriniñ pekinmesini tiledi. Bundan soñ o, mezkür bayram müim milliy bayramlardan biri olğanını hatırlatıp, dua oqudı. Milliy Meclis adından Meclis reisiniñ muavini Remzi İlyasov çıqışta bulundı ve er kesni Bayraq bayramınen hayırladı. “Bugün biz milliy birligimiz-beraberligimizni numayış etken Milliy bayraq bayramını qayd etmektemiz. Semetdeşlerimizniñ ğayreti ve birligimiz bu müim bayramnıñ keçirilmesini teminlediler, – dedi Remzi İlyasov. – Bu daa bir kere biz bir halq ve bir millet olğanımıznı, tarihımıznı bilgenimiz ve ürmet etkenimizni köstere”.Bunıñ kibi de Remzi İlyasov qayd etti ki, milliy temsillerimiz er angi faaliyetimizde, olsun siyaset, iqtisadiyat, sport, tasil ve sanatta bulunmalıdır. “Biz öz bayrağımıznı yükseklerge kötermek kerekmiz ki, milliy simvollarımıznı bütün dünya tanısın!”, – dedi İlyasov Meclis Kâtibiyetiniñ başı Zair Smedlâyev öz nevbetinde dedi ki, er bir halqnı onı diger halqlardan ayırğan, asılını köstergen bir qaç belgi bardır. Elbette ki, birincisi – bu doğğan yeri, ekincisi – tili ve dinidir. Bugün biz devlet simvolı olğan bayraq bayramını qayd etmektemiz. Allahqa şükürler olsun, bu bayramnı 4-nci sefer qutlaymız. Maddiy masraflarnı boynuna alğan cemaatımız sağ olsun. Ne içün? Çünki halqımıznıñ milliy añı bar. Bizim halqımız böyle olğanı, bayrağımız olğanınen ğururlanam. Ümüt etem ki, balalarımız bu bayraq devlet bayrağı olğan künni körerler”. Gala kontsert ögünden bayram musafirleri çeşçit yarışlarda iştirak etebildiler. Bayram meydanına kirgen musafirlerni “Gençlik” ansambliniñ artistleri, ballon ve küçük bayraqlar tarqatqan yaşlar qarşıladılar.

Mında kitap yarmalığında begengen kitaplarnı, el sanatı işlemelerini satın almaq, “Bizim taraf” yerde resim sızuv, Küreş boyunca yarışlarnı seyir etmek mümkün oldı. Yarışlarnıñ ğalipleri qıymetli bahşışlarnen taqdirlendiler. Bayramnı Ukraina ve Qırımda nam qazanğan artistlerniñ icrasında kontsert yaraştırdı. Bayram tedbirlerinde 2000-den ziyade adam qatıldı.