Refat Çubarov: Zanımca, er kesniñ aqılı şuña yeter ki, halqımız tarihındaki facialı vaqia Qırımda yaşağan insanlarnıñ episini birleştirebilsin

08.05.2013

Qırımtatar halqı soyqırımı qurbanlarınıñ hatırasına ve sürgünlikniñ 69 yıllığına bağışlanğan matem tedbirlerine azırlıq aqqında Meclis reisiniñ birinci muavini Refat Çubarov, muavini Ahtem Çiygoz ve Meclis azası Emine Avamileva tarif ettiler.

Cümleden, mayıs 17,18 künleri tedbirleri keçken yıllarda olğanı kibi – Ukrain teatrinde mayıs 17-de hatıra aqşamı olıp, ondan soñ saat 17-de Aqmescitte “Haytarma” birinci qırımtatar tarihiy bediiy filmi numayış etilecek.

“Filmniñ premyerasını tolusınen ATR kanalınıñ komandası teşkil ete, – dedi R. Çubarov. – Filmni mayıs 18-ge qadar çıqarmaq ve köstermege azırlap yetiştirgenleri içün telekompaniya yolbaşçılarına minnetdarmız”

Bundan da ğayrı, mayıs 17 künü aqşam Aqmescitniñ merkeziy meydanında gençler “Qalbiñde ateş yaq” ananeviy aktsiyanı keçirecekler. Aktsiyağa keçken yıllardakisi kibi çeşit yaştaki 7 biñ insan qoşulması planlaştırıla.

“Mayıs 18 künü qırımtatarlar yaşağan er yerde matem mitingleri ötkerilecek, devam etti Çubarov. – Biz bütün regioneal ve yerli meclislerimizge mayıs 17-18 matem merasimlerini yerli akimiyet ile birlikte keçirmelerini tevsiye etemiz. Zanımca, er kesniñ aqılı şuña yeter ki, halqımız tarihındaki facialı vaqia Qırımda yaçşağan insanlarnıñ episini birleştirebilsin

Bunıñ kibi de, R. Çubarovnıñ aytqanına köre mayıs 18 künü saat 12.00-de “Matem ve Birlik daqqası” halqara aktsiyası olacaq. Bundan soñ kolonnalar Aqmescit soqaqlarından merkeziy meydanğa taba areket etecek. Kolonnalar kelgen soñ saat 13.00-de Bütünqırım matem mitingi başlanacaq.

Refat Çubarov qayd etti ki, kolonnalar toplanğan yerlerde de mitingler keçirilip, olarda insanlar içindeki derdlerini töker ve 1944 senesi sürgünligi şaatlarınıñ ikâyelerini diñlerler. Jurnalistlerge hıtap eterken, Meclis reisiniñ birinci muavini kütleviy matbuat vastaları vekillerine mayıs 18 künü matem ve birlik daqqasını kanallar keregi kibi numayış etilmesini teleradiokompaniyalarnıñ yolbaşçılarına yetkizmelerini rica etti.

Refat Çubarov bunıñ kibi de dedi ki, Qırımtatar halqınıñ meclisi er yılı on biñlernen insanlarnı toplağan Bütünqırım matem mitingini keçirüv stsenariysini deñiştirmek niyetinde degil. “Amma aynı vaqıtta belli ki, miting iştirakçileri ve çıqışta bulunğanlarnı qırımatarlarnıñ bugünki ve tünevinki vaziyetine dair çıqış ve beyanatlar birleştirir”, dep qayd etti R. Çubarov.

Bütünqırım matem mitinginiñ soñunda er yılki kibi matem mitingi iştirakçileriniñ qararı qabul etilecek.

Mateyem merasimlerine bu sene Türkiye, Amerika, Romaniya ve Rusiyedeki qırımtatar diasporası vekilleriniñ kelmesi beklenile.