Refat Çubarov ve Mustafa Cemilev Qırımda keniş kölemli provokatsiyalar oluvı telükesi bar, dep sayalar

07 Mart 2014

Bu aqta olar 2014 senesi mart 7 künü Türkiye Tış işleri naziri mesleatçısınıñ yardımcısı Ali Kemal Aydın ve Türkiyeniñ Ukrainadaki Vefqulade ve Toluvekâletli Elçisi Mehmet Samsar ile körüşüvde bildirdiler.

Meclis reisi Refat Çubarov ve qırımtatar halqınıñ lideri, Ukraina halq deputatı Mustafa Cemilev Türkiye Tış işleri naziri mesleatçısınıñ yardımcısı Ali Kemal Aydın ve Türkiyeniñ Ukrainadaki Vefqulade ve Toluvekâletli Elçisi Mehmet Samsar ile körüştiler. Körüşüvde bunıñ kibi de Türkiye Cumhuriyetiniñ Odessada Baş konsulı Nur Sagman ve Türkiyeniñ Ukrainadaki Elçiliginiñ 2-nci kâtibi Fatih Ozturk iştirak ettiler.

Meclis reisi Qırımda soñki künlerde meydanğa kelgen vaziyetni tafsilâtlı tarif etip, bu vaziyetten Ukraina mustaqilligini saqlap qaluv ve tınç çezimge esaslanğan Meclisniñ pozitsiyasını ve tekliflerini beyan etti.

Refat Çubarov ve Mustafa Cemilev Qırımda çeşit millet mensüpleriniñ ömürine telükeli olğan keniş kölemli provokatsiyalar yapılabilir, dep sayalar. Ve aynı şu sebepten Meclis halqara cemaatçılıqqa BMT barışıq küçleriniñ Qırımğa kirsetilmesi ricasınen muracaat etti. Meclis reisi yaramada sakinlerini “referendum”ğa azırlıq devamında boykot etmege çağırdı.

Öz tarafından türkiyeli musafirler Qırımdaki iñqiraznı faqat diplomatik yolnen çezmek oğrunda Türkiye ükümeti yapqan areketleri aqqında bildirdiler.

Cümleden, Ali Kemal Aydın şunı da hatırlattı ki, Qırımdaki vaziyet boyunca Türkiye Tış işler naziri Ahmed Davutoğlu Ukraina yolbaşçılarınen, bunıñ kibi de Türkiyedeki Qırımtatar dernekleriniñ vekillerinen bir sıra körüşüvler keçirdi.

Bundan da ğayrı, Türkiye Tış işleri naziri mesleatçısınıñ yardımcısı Ali Kemal Aydınnıñ bildirgenine köre, Türkiye Baş naziri Recep Tayip Erdoğan Türkiye Büyük Meclisniñ qırımtatar tamırları olğan deputatlar ve öz yardımcıları ile keniş bir körüşüv ötkerdi.

Ali Kemal Aydın şunı da qayd etti ki, Türkiye baş naziri Recep Tayip Erdoğan Rusiye prezidenti Vldaiimr Pütin ile telefon vastasınen olğan subetinde Ukraina territorital bütünligi ve Qırımdaki inqiraznı tınç yolnen çezilmesine Türkiyeniñ pozitsiyasını bildirdi.