Refat Çubarov Türkiye Cumhuriyetiniñ Odessadaki Baş konsulı Huseyn Ergani ile körüşti

19 Mart 2011

Bütündünya qırımtatarlar kongressiniñ prezidenti, Meclis reisiniñ birinci muavini Refat Çubarov 2011 senesi iyül 19 künü Türkiye Cumhuriyetiniñ Odessadaki bu vazifege daa yaqında tayin etilgen Baş konsulı Huseyn Ergani ile körüşti

Aqmescitte olğan bu körüşüv devamında Refat Çubarov ve Husein Ergani qırımtatar halqınıñ vaziyetini muzakere etip, Ukraina ve Türkiye arasındaki er taraflı alâqalarnıñ kenişlemesine siltem olacaq gumanitar inkişaf meselelerine ayrıca emiyet berdiler. Bunıñ kibi de Refat Çubarov Türkiye Cumhuriyetiniñ Odessadaki Baş konsulı Huseyn Erganini Aqmescitte tiklenecek Büyük Cuma caminiñ qurucılığına azırlıq işleriniñ ketişatı ile tanış etti.

Huseyn Ergani Baş konsul vazifesinde Qırımğa yapacaq birinci ziyaretine azırlanırken, kütleviy informatsiya vastalarında cemiyet ve akimiyet munasebetlerine dair yazılar ve haberlerni büyük diqqatnen ögrengenini söyledi.. “Zanımca, – dedi Husein Ergani , – soñki vaqıtta Qırımda siyasiy-içtimaiy ceryanlarnıñ bütün faal iştirakçileri arasında dialog şekillendi. Bu ise cemiyetni raatsızlağan problemler çezilmesiniñ şartıdır”.

Ukraina ve Türkiye arasındaki işbirlikni kenişletmek mevzusını devam eterek Refat Çubarov Türkiye Cumhuriyetiniñ Odessadaki Baş konsulı Huseyn Erganiniñ diqqatını Qırım akimiyeti çetelli yatırımcılarnı çeşit leyhalarda iştirak etmege davet etkenleri qırımlı akimlerniñ Qırımnıñ iqtisadiy inkişafı saasında belgilegen vazifeleriniñ ciddiyliginden delâlet bergenine celp etti ve subetdeşine Türkiye çeşit regionlarınıñ Qırım şeerleri ile ortaqlıq munasebetleriniñ pekinmesine qoltutmağa teklif etti.

Körüşüvniñ soñunda Refat Çubarov Türkiye Cumhuriyetiniñ Odessadaki Baş konsulı Huseyn Erganige Qırımnıñ inkişafı ve qırımtatar halqınıñ meselelerine diqqat ayırğanı içün teşekkür bildirdi