Refat Çubarov R. Kenjaliyevniñ Qırım Milletlerara meseleler boyunca cumhuriyet komitetiniñ reisi olaraq tayinlengenini izaatladı

25 Iyül 2012

Şimdiki Qırım akimiyeti qırımtatar halqınıñ vekâletli organı olğan Meclisnen, çeşit seviyelerdeki şuralarnıñ qırımtatar deputatları ile dialog alıp barmaqtan qaçınğanı çoqmilletli Qırım cemiyetiniñ faydasına oynamay.

Bu aqta CrimeanTatars.org saytına Meclis reisiniñ birinci muavini Refat Çubarov R. Kenjaliyevniñ Qırım Milletlerara meseleler boyunca cumhuriyet komitetiniñ reisi olaraq tayinlengenine izaat bergende ayttı.

O, bunıñ kibi de qayd etti ki, evel Cumhuriyet milletler komitetiniñ reisi tayinlengende Meclisnen aqıl tanışıla edi. Endi ise Nazirler şurası bunı yapmadı.

“Nazirler Şurası yolbaşçılarınıñ böyle areketleri meni asla da taacüplendirmedi, çünki olar kendileri seçken taktikağa köre iş tutalar: “biz Qırımnı nasıl idare etmek kerekligini özümiz bilemiz, Qırım Yuqarı Şurasında, şeer ve rayon şuralarında da er angi qararnı keçirmemiz içün reylerimiz yeterli”, – dedi R. Çubarov.

Crimeantatars.org saytınıñ komitetniñ yañı reisinen dialog alıp barmaq istiqballeri hususında sualine, Meclis reisiniñ muavini onıñ işlerine qıymet kesmek içün vaqıt kerek, dedi. ” Er bir insan faaliyetiniñ eñ yahşı ölçüsi işiniñ neticeleridir. Cumhuriyet milletler komiteti reisi aqqında iç olmağanda bir kvartal keçken soñ laf etermiz”.

Bundan da ğayrı, R. Çubarov şunı da qayd etti ki, halq menfaatları oğrunda Meclis iç bir türlü dialogdan vazgeçmedi.

Hatırlatamız ki, Qırım Milletlerara munasebetler ve sürgün olunğan insanlarnıñ işleri boyunca cumhuriyet komitetiniñ reisi Edem Dudakov ariza berip vazifesinden öz isteginen istifağa ketti.

2012 senesi iyül 25-te Qırım Yuqarı Şurası Qırım Milletlerara munasebetler ve sürgün olunğan insanlarnıñ işleri boyunca cumhuriyet komitetiniñ reisi vazifesine Refat Kenjaliyevni tayinledi.

2012 senesi mart ayında R. Kenjaliyev Qırım baş naziriniñ mesleatçısı etip tayinlengen edi. 2004 senesi Qırımtatar halqı Qurultayınıñ erkânından çıqarıldı.