Refat Çubarov: Qırımtatarlarnıñ saqlanıp qalacaq, halq olaraq inkişaf etecek başqa Vatanı yoqtır. Demek, ukrain devleti qırımtatar halqınıñ kelecegi içün mesülietlidir

17 May 2013

2013 senesi mayıs 17-de Ukrain teatrinde qırımtatar halqı sürgünliginiñ 69 yıllığına bağışlanğan hatıra aqşamı olıp keçti. Onda Qırım ükümeti, Qırımtatar halqı Meclisi ve Qırım cemaatçılığınıñ vekilleri iştirak ettiler.

Minberden Milliy Meclis reisiniñ birinci muavini Refat Çubarov ve Qırım Nazirler Şurası reisiniñ muavini Georgiy Psaröv çıqışta bulundılar.

Georgiy Psarev Ukraina Prezidenti Viktor Yanukoviçniñ muracaatını oqudı. “Bu kerçekten de matem künü, siyasetçilerge, cemaat, bütün nesillerge insan ömürini qorçalamağa, şahıslarnı ürmet etmege çağırğan bir derstir. Kelecek nesiller, balalarımıznıñ kelecegi içün biz biri-birimizni ürmet etmek kerekmiz ki, bu facia bir daa tekrarlanmasın. Bundan 69 yıl evelsi yüz bergen vaqia devletimizniñ tarihında iç bir vaqıt olmasın”, – dedi o.

Meclis reisiniñ birinci muavini, Qırım Yuqarı Şurasınıñ deputatı, “Qurultay-Ruh” fraktsiyasınıñ başı Refat Çubarov 69 yıl evelsi Qırım toprağında maqsadı – Qırımnıñ tamır halqı ve insaniyetniñ eñ özgün milletlerinden biri olğan qırımtatar halqını yoq etmek kibi misilsiz cinayet yapıldı, dep qayd etti.

“Mayıs 18 arfesinde Qırım ve qırımtatar halqı 69 yıl evelsi oğratılğan vaziyetni siyasetleştirmeñiz degen çağıruvlar yañğıray, – devam etti R. Çubarov. –

Bütün qırımtatarlar kibi men de bu çağıruvğa uymaq isterdim. Eger qırımtatar halqına nisbeten yapılğan bu cinayetniñ nevbetteki yıldönüminde er şey keçmişte qaldı, soyqırım aqibetleri yoq etildi, ve artıq bizim ve bizim ukrain, rus ve diger milletli qomşularımız, sevgili Qırımımıznıñ 1944 senesi mayıs 18 soyqırım yapqan, soñra on yıllarnen ğurbet illerde yaşamağa mahküm etilgen totalitar rejimden asabalıq olaraq qalğan iç bir türlü problemleri qalmadı, dep olsaydım, kendimi siz kibi bahıtlı insan, dep sayardım. Men kerçekten de siyaset aqqında iç qonuşmaq istemezdim, amma 1944 senesi mayıs 18,19, 20, 21 künleri Qırımda olıp keçken facianıñ şimdi başı-közü sağ şaatlarğa olarnıñ adaletke ümütleri öyle de kerçekleşmegini nasıl añlatmalı, bunı maña ve kendiñizge aytıñızçı”

Meclis reisiniñ birinci muavini Refat Çubarov Ukraina mustaqilligi ilân etilgen soñ yigirmi yıl içinde qırımtatar halqınıñ aqlarını tiklev, tuvğan yurtunda ğayrıdan tiklenmesi içün imkân yaratqan iç bir qanun qabul etmegenini tekrar hatırlattı. “Biñlernen qırımtatarlar sürgünlik yerlerinde yaşamaq zorundalar, – dedi Çubarov. – aynı zamanda biñ türlü meşaqatlar ile Vatanğa qaytıp olğanlarnıñ çoqluğı öz ailesi içün eñ zarur şaraitlerni bile yaratıp olamay. Qırımtatarlar tolplu yaşağan qasabalarda yollar, ışıq, mektep yoqtır. Bu sene Ukraina bücetinden ise 11 million grivnâ para ayırılıp, olarnıñ 5 millionı kapital salımlardır. Böyle finansirlev masharalıq olğanını er kes añlay. Ne içün bu aqta biz aytmaycaq ekenmiz?”

Refat Çubarov qayd etkeni kibi 1944 senesi facialı vaqialar aqibetinde Qırımnıñ yüzüni bozğan tarihiy hatıra silindi, Qırım ve onıñ tamır halqınıñ aqiqiy tarihını aks etken iç bir tarihiy ad qaytarılmadı.

Öz çıqışında Meclis reisiniñ birinci muavini qayd etti ki, Qırımtatarlarnıñ saqlanıp qalacaq, halq olaraq inkişaf etecek Qırımdan başqa Vatanı yoqtır. Demek, ukrain devleti qırımtatar halqınıñ kelecegi içün mesülietlidir.

Refat Çubarov emin ki, akimiyetke qırımtatarlarınen munasip seviyede qonuşmalı. Onıñ fikrince er kün, er an bir maqsad – Qırım ve onıñ bütün sakinleriniñ ilerilemesi oğrunda semereli siyaset qullanılmalı. “Qırımtatar halqı soyqırımı qurbanlarına Allah rahmet eylesin, ruhları şad olsun”, – dep yekünledi öz çıqışını Refat Çubarov.