Refat Çubarov qırımtatar problemini Poloniyada 23-nci İqtisadiy forumda seslendirdi

05 Sentâbr 2013

“Şarq araştırmaları institutı” fondınıñ daveti boyunca Meclis reisiniñ birinci muavini, Bütündünya qırımtatarlar kongressiniñ prezidenti Refat Çubarov 2-13 senesi sentâbr 3-5 künleri Poloniyanıñ Krınitsa şeerinde 1991 senesinden itibaren er yılı keçirilgen ve Merkeziy ve Şarqiy Avropada tanılğan tedbir olğan İqtisadiy forum işinde iştirak ete.

Ağımdaki yılnıñ forumı “Yañı dünya tertibiniñ istiqballeri” şiarı altında keçerken, dünya iqtisadiy iñqırazı ketirgen iqtisadiy, siyasiy ve içtimaiy deñişmelerge diqqat ayıra.

R. Çubarov haber etkenine köre İqtisadiy forumnıñ vazifesi Avropa Birligi ve qomşu devletler arasında siyasiy ve iqtisadiy işbirlikniñ inkişafı içün oñaytlı müit yarata.

“Krınitsa – bu, dünya siyasiy haritasında böyle kölemde Şarq ile Ğarp körüşken müim bir noqtadır. Er yılı forumğa 2500 iştirakçi – siyasiy, içtimaiy ve cemiyet ömür liderleri, Avropa, Asiya ve Amerikanıñ 60 devletlerinden 500 jurnalist kele, – dep haber etti R. Çubarov. – Bu Merkeziy ve Şarqiy Avropada bu kibi eñ büyük tedbirlerden biridir”.

Bundan da ğayrı, sentâbr 4 künü İqtisadiy forum çerçivesinde ötkerilecek “Dava potentsialı? Merkeziy ve Şarqiy Avropa devletlerinde milliy azlıqlar” mevzusında munaqaşalı seminarda Meclis reisiniñ birinci muavini, Bütündünya qırımtatarlar kongressiniñ prezidenti Refat Çubarov qırımtatar problemini bugünki kün ölçüsi noqtai nazarından taqdim etti.