Refat Çubarov: Qırımtatar halqı öz toprağında aqları tolusınen tiklenmesine qadar küreşecek

01 Noyabr 2013

Cuma künü 2013 senesi noyabr 1-de Qırım hanlığınıñ tarihiy paytahtı Bağçasaraydaki Hansaray azbarında yañı saylanğan Meclis reisi ve Meclis azaları öz vazifelerine kirişmesiniñ tantanalı merasimi olıp keçti

Tantanalı merasimde Milliy Meclisniñ sabıq reisi Mustafa Cemilev, Meclis reisi Refat Çubarov, evelki çağırılış Qurultayı, Meclis azaları, VI çağırılış Qurultayınıñ birinci sessiyasında saylanğan Meclis azaları, Teftiş komissiyasınıñ azaları, regional ve yerli meclis azaları, milliy areket veteranları,milliy idare organlarınıñ qoltutuvında saylanğan çeşit seviyedeki şuralarnıñ deputatları, qırımtatar cemaat teşkilâtlarınıñ vekilleri, Bağçasaray sakinleri ve musafirler iştirak ettiler.

Merasim Hancamide cuma namazından ve doquz Qırım hanı ve aile azaları, saray zadekânları defn etilgen hanlar qabristanında duadan başlandı.

Tedbirni alıp barğan VI çağırılış Qurultay delegatı Şevket Memetov tantanalı merasimniñ tarihiy emiyetini qayd eterken, aman-aman yüz yıl evelsi Bağçasarayda Hansaray azbarında Noman Çelebicihan, Cafer Seydamet, Asan Sabri-Ayvazov milliy bayraqnı tiklegenlerini hatırlattı. “1917 senesi noyabr ayında Qırımtatar halqınıñ birinci qurultayı keçirildi, – dedi Memetov. – 1930 –ncı yıllarda ise bolşevikler başlağan repressiyalar aqibetinde o devirniñ körümli qırımtatar siyasetçileri öldürildiler”.

Hansaray azbarındaki tantanalı merasim Qırımtatar akademik milliy teatr artistleri Emine Cevdetova ve Seytabla Memetov icrasında milliy gimnnen başlandı.

Bundan soñ Milliy Meclisniñ sabıq reisi Mustafa Cemilev çıqışta bulundı. “Halq tarafından saylanğan organ çeşit sotsiologik tedqiqatlarğa baqmadan Ukraina ve sabıq Sovetler Birligi devletlerinde semetdeşler eñ çoq qoltuttığı organdır, – dedi Mustafa Cemilev. – Ümüt etem ki, ileride de öyle olur. Bu sene biz saylav sistemine deñişmeler kirsettik ve onı daa da demokratik yaptıq. Bu sistema boyunca Qurultay delegatlarını seçtik. Bunıñ kibi de Meclisniñ yañı reisini sayladıq”.

Mustafa Cemilev Meclis reisi vazifesine namzet olaraq eki munasip siyasetçi Refat Çubarov ve Remzi İlyasov kösterilip, Refat Çubarov yeñgenini hatırlattı. Onıñ aytqanına köre, “eger Remzi İlyasov saylanğan olsa edi, bugün o da öz vekâletligini böyle tantanalı şekilde başlar edi”.

M.Cemilevniñ söylegenine köre Refat Çubarov keçken asırdan berli milliy arekettedir. “O, 1991 senesi “Qırımtatar halqı mustaqilligi aqqında deklaratsiya”nı azırlağanlardan biri edi. İnanam ki, o, bu deklaratsiyanı ömürge keçirebilir”, – dedi M.Cemilev.

Mustafa Cemilev yañı saylanğan Meclis erkânınıñ seviyesine yüksek qıymet kesti. “Olarnıñ arasında öz halqını sevgen ve oña yardım etmege tırışqan yaşlar çoq”, – dedi M.Cemilev. – Allah yardımcıları olsun”.

Soñra Meclisniñ sabıq reisi Mustafa Cemilev Meclisniñ yañı saylanğan reisi Refat Çubarovğa Meclis Nizamnamesi ve milliy bayraqnı berdi.

Qırım musulmanlarınıñ müftisi haci Emirali Ablayev ise yañı reiske musulmanlarnıñ muqaddes kitabı Quran-ı Kerimni taqdim etti. Refat Çubarov Qurannı üç kere öpip, “Ant etem, Millet içün çalışmağa söz berem!” dep yemin etti.

Ve merasimde bulunğanlar ögünde çıqışta bulunıp, qırımtatar halqınıñ lideri Mustafa Cemilevni, Qırım musulmanlarınıñ müftisini, semetdeşlerimizni, Bağçasaray sakinleri ve musafirlerni selâmladı.

“96 yıl evelsi aynı şu yerde Hansarayda Qırımtatar halqı 1-nci qurultayınıñ milletniñ aqlarını temin etmek maqsadınen saylanğan delegatları öz vazifelerine kiriştiler, – dedi R. Çubarov. – 20 yıl devamında halqımız bir çoq facialı adiselerni başından keçirdi. Qırımtatarlar zorbalıqnen sürgün etildiler, yıllarca olarnı öldürmege tırıştılar”. Meclis reisiniñ sözlerine köre bir çoq meşaqatlarğa baqmadan qırımtatar halqı qırılmadı, bükülmedi, öz aqları, Vatanqa qaytuv içün küreşte qattı turdı ve bugün de bu küreşni alıp bara, ta ki milletniñ aqları tolusınen tiklenilmegence devam etecek.

“Bugün mında toplanırkenmiz ana-babalarımız, dedelerimiz, milliy areket veteranları ve 1-nci Qurultaynıñ cesür liderlerine ve bugünki liderimizge soñsuz minnetdarlığımıznı bildirmek isteymiz, – devam etti nutqını R. Çubarov ve 6-ncı çağırılış qurultayınıñ delegatları, Meclisniñ yañı azaları evelki çağırılışlarda çalışqan meslekdeşleriniñ işini devam eteceklerine, qırımtatar halqınıñ parlaq kelecegine salmaqlı isse qoşacaqlarına eminlik bildirdi.

Bundan soñ Meclisniñ yañı saylanğan er bir azası milliy bayraqnı öperek: “Ant etemen, söz beremen millet içün çalışmağa” dep yemin etti.

Tantanalı tedbirden soñ Meclis ve Qurultay Teftiş komissiyasınıñ azaları 1917 senesi Noman Çelebicihan ve Cafer Seydamet iştirakinde 1-nci Qurultay delegatları kibi Demir qapı ögünde, Hansaray balkonlarınıñ birinde ve Hansarayğa kirişte umumiy resim çektirdiler.

Merasimniñ soñunda qırımtatar halqınıñ lideri Mustafa Cemilev ve Meclis reisi Refat Çubarov brifing keçirdiler. Onda Refat Çubarov kadrlarnı tayinlev ve Meclisniñ ilerideki işi hususındaki suallerge cevap berirken: “Menim komandam Meclisniñ 32 azasıdır, ve biz qırımtatar halqınıñ kelecegi içün çalışacaqmız”, dedi.