Refat Çubarov: Qırımda eki caminiñ yaqılmasını Meclis terrorist areketleriniñ alâmeti, dep saya

16 Oktâbr 2013

2013 s yenesi oktâbr 16 künü Milliy Meclis reisiniñ birinci muavini, Qırım Yuqarı Şurasınıñ deputatı Refat Çubarov, Meclis Kâtibiyetiniñ başı Zair Smedlâyev ve Qırım musulmanları müftisiniñ muavini Esadulla Bairov “Qırımda camiler yaqılması: sabırımız sınavı ya da Qırımda kölemli fesatlarnıñ başlanmasımı?” mevzusında matbuat konferentsiyasını keçirdiler.

Malüm ki, musulmanlarnıñ eki büyük bayramlarından biri olğan Qurban bayramı arfesinde Qırımda eki cami yaqıldı. Oktâbr 13-14-ke keçer gecesi Saqta yaqılğan cami içinde ateş muaqaddes kitaplar, hocalıq eşyalarını ğayıp etti, divarlarına zarar ketirdi. Camige 500 biñ grivnâlıq zarar ketirildi. Oktâbr 15 künü bayram namazı arfesinde ise Qurman rayonınıñ Qarasan köy camisi yanğınğa oğradı.

Milliy Meclis reisiniñ birinci muavini, Qırım Yuqarı Şurasınıñ deputatı Refat Çubarov Qırımda eki caminiñ yaqılmasını Meclis terrorist areketleriniñ alâmetidir, dedi.

“Terrorist areketlerniñ birinci maqsadı cemaatnı qorquzmaqta, – dedi Çubarov. – Allağa şükür ki, bu fesat aqibetinde insanlar qazalanmadı. Lâkin bunıñnen bu areketlerni terrorist aktı degil demek olmaz. Cinayetçiler bu areketlerni nasıl maqsadnen yapqanları bes-belli. Bu adise sımarışçılarınıñ vazifesi cemaat arasına şına qaqmaq, şübelerge yol bermek ve neticede insanlar arasında biri-birine işançsızlıq, nefret qozğamaqtır”.

R.Çubarovnıñ fikrince Qırım cemaatı içün eñ doğrusı adiseni qaralamaq ya da uzun muzakerelerge dalmaq degil de, uquqqoruv organlarınıñ konkret neticelerini talap etmek, provokatsiyağa berilmemektir.

Onıñ qayd etkenine köre, Qırım uquqqoruyıcıları böyle cinayetlerni qısqa vaqıtta açmağa imkânları bar. “Bazı ekspertlernen yapılğan konsultatsiyalar bugünde-bugün cinayetlerni pek tez vaqıtta açmaq içün tehnikiy usullarnıñ çoqluğı aqqında hulâsa çıqarmağa imkân bere. Amma bunıñ içün cinayetke cemiyet içün ğayet telükeli dep qıymet kesmek ve bütün küçni onıñ açılmasına yöneltmek kerek”, – dep qayd etti Refat Çubarov.

Milliy Meclis reisiniñ birinci muavini dedi ki, yapılğan cinayetlerniñ açılmaması istek olmağanı ya da Qırım cemiyetini telükege üytegen küçlerge qoltutuvdan delâlet bere.

“Biz vaziyetke qarardan ziyade telükeli, dep qıymet keskenimiz alda, ne sebepten Qırım akimiyeti bu qadar lâqayd olğanını añlamaymız. Eminim ki, Qırım cemiyetiniñ bir qısmı böyle şok alında olğanda Qırımnıñ dinlerara munasebet meseleleri içün mesülietli vazifedar şahısları camilerni kelip baqmaları kerek edi”, – dedi Çubarov.

Bundan da ğayrı R. Çubarov Qırım ükümeti camiler yaqılması boyunca sadece reisniñ izaatınen sıñırlanmayıp, bu adise aqqında resmiy beyanat yapması kerek edi, dep saya. “Çoqmilletli Qırım cemiyeti içün bu bir signal olur edi”, – dedi Qırım Yuqarı Şurasınıñ deputatı Refat Çubarov