Refat Çubarov Qırım Yuqarı Şurasınıñ minberinden ana tilinde çıqışta bulundı

26 September 2012

2012 senesi sentâbr 26 künü Qırım parlamentiniñ sessiyasında “Krım” Devlet teleradiokompaniyasınıñ direktorı vazifesine Stepan Gülevatıynıñ namzeti muzakere etilgen vaqıtta Qırımtatar halqı meclisi reisiniñ birinci muavini, Qırım Yuqarı Şurasınıñ “Qurultay-Ruh” fraktsiyası başı Refat Çubarov mezkür mesele boyunca fikirini qırımtatar tilinde ifade etti.

Ve böyleliknen 2012 senesi avgust 15-te Qırım parlamenti sessiyasında bergen sözüni tuttı. Qırım Yuqarı Şurası reisi Vladimir Konstantinovnıñ ricasına binaen terciman davet etildi, lâkin terciman deputat R. Çubarovnıñ çıqışını keregi kibi çevirip olamadı. Şu sebepten Refat Çubarov öz sözlerini kendisi tercime etecegini söyledi.

Ukrain ve qırımtatar tilinde teleyayınlar vaqtı pek sıñırlı olğanını R. Çubarov endi ukrain tilinde ayttı. Belli ki, “Krım” devlet teleradiokompaniyasında qırımtatar tilinde yayınlarınıñ kölemi künde 26 daqqanı teşkil ete. Demek, Refat Çubarov qırımtatarlarnıñ yarımada ealisine nisbeten fayızını qayd etkenine köre yayınlar vaqtı aftada 21 saatke artmaq kerektir.

Parlament sessiyasınıñ işi devamında Refat Çubarov daa bir qaç kere öz fikirlerini yerinden turıp deputat meslekdeşlerine devlet ve qırımtatar tillerinde ifade etti.

Hatırlatamız ki, 2012 senesi avgust 15 künü “Qırım Muhtar Cumhuriyetinde Ukrainanıñ “Devlet til siyasetiniñ esasları aqqında” qanunınıñ amelge keçirilmesi boyunca birinci dereceli çareler aqqında” qarar muzakeresiniñ devamında Qırımtatar halqı meclisi reisiniñ birinci muavini, Qırım Yuqarı Şurasınıñ “Qurultay-Ruh” fraktsiyası başı Refat Çubarov Qırım parlamenti minberinden kelecekte parlament toplaşuvlarında qırımtatar tilinde qonuşacağını bildirgen edi.

“Diqqatıñıznı şuña celp etmek isteyim ki, Qırım Yuqarı Şurasınıñ kelecek sessiyasından başlap üç tilde çıqış yapacam. Qırımtatar ve belki de ukrain tilini bilmegen zenaatdaşlarım ve jurnalistler içün tercimanlarnı azırlamañıznı rica etem. Menim öz aqqımdan qullanmaq meramındam”, – dedi Refat Çubarov.