Refat Çubarov: Qırım Yuqarı Şurasınıñ Anayasağa zıt ve cinaiy qararları içün Ukraina Regionlar partiyası Qırım teşkilâtınıñ başı Anatoliy Mogilev da cevap berecek

21 Fevral 2014

Meclis reisi Refat Çubarov, bugün fevral 21 künü Qırım Yuqarı Şurası deputatlarınıñ çoqluğı Qırımnı Ukrainadan ayırmaq qararına, bunıñ kibi de Rusiyege er angi muracaatlarğa qoltutsalar, şimdi Kiyevde bulunğan Qırım baş naziri Anatoliy Mogilöv da Ukraina Regionlar partiyası Qırım teşkilâtınıñ başı sıfatında mesülietlidir, dep saya. Bu aqta o, fevral 21 künü Facebookta öz saifesinde yazdı

Hatırlatamız ki, fevral 20-de aqşam Meclis reisi Facebookta yazğan haberine köre, oña saat 22.42-de çañ qaqqan, “Qurultay-Ruh” fraktsiyasınıñ azası Leonid Pilunskiy Qırım Yuqarı Şurasından telefon vastasınen fevral 21 künü saat 12.00-de nevbetten tış sessiya keçirilecegini bildirgenlerini ayta. Sessiyanıñ kün tertibi hususında iç bir şey aytmayıp, “kelseñiz, bilirsiz” degenler. Meclis reisi öz komissiyasınıñ Yuqarı Şura kâtibiyetinden kerçekten de sessiya fevral 21 künü saat 12-de olacağını bile. Sessiyanıñ kün tertibinde “Ukrainada içtimaiy-siyasiy vaziyet aqqında” mesele baqılacaq.
“Qırım Yuqarı Şurasınıñ reisi, söz kelimi alâ daa Moskvada bulunğan ve yarın saba kelecek, V. Konstantinovnıñ bugünki beyanatları esnasında ve yaramay duyğularnen Qırım parlamenti reisiniñ muavini Grigoriy İoffege telefon açtım, – dep yaza Refat Çubarov. – Böyle acele toplaşuvnıñ sebebi nede, degen sualime G. İoffe: “Sen bilesiñmi, Kiyevden evlerine qaytayatqan 6 qırımlını öldürdiler?”, dep cevap berdi. “Deşet! Ya sessiyanıñ ne keregi bar? Siz bu facia artına gizlenip, çoqtan taşıdığıñız ğayeni kerçekleştirmege – Rusiyeden “imdat” soramağa isteysiñizmi? Qırım Yuqarı Şurası alğan bu qararnıñ aqibetleri Qırım ve onıñ sakinleri içün daa ziyade büyük facianı açarlar” dedim. Ekimiz de bağırıp başlaymız… İşte, Qırım Yuqarı Şurasınıñ reisi V. Konstantinov ve onıñ etrafındakiler maqsadlarını faş ettiler: yarın Qırımnı felâket içine bıraqqan qararlar alınabilir”.