Refat Çubarov: Qırım Yuqarı Şurasındaki parlament çoqluğı olarnıñ fikirinden farqlı fikirlerni bildirgen deputatlarnıñ pozitsiyasını da esapqa almaq borclu

25 Dekabr 2013

2013 senesi dekabr 25 künü Qırım parlamentiniñ deputatları 2013 senesinde Qırım Yuqarı Şurası altıncı çağırılış VII sessiyasınıñ soñki toplaşuvını keçirdiler.

Toplaşuvnıñ başında “Qurultay-Ruh” fraktsiyasınıñ başı Refat Çubarov sessiya salonında, onıñ fikrince, Ukraina qanunlarını bozğan plakatlar asılğanına narazılığını bildirdi.

Cümleden, sessiya salonınıñ divarlarında “Yanukoviç –Qırım-Rusiye”, “Qırım Gümrük birliginiñ tarafdarı”, bunıñ kibi de “Banderacılarğa Qırımda yol yoq!” ve “Svoboda” birleşmesi cevapqa çekilsin” kibi şiarlar asılı edi.

Refat Çubarov Qırım parlamentiniñ başı Vladimir Konstantinovdan mezkür şiarlarnı asmağa kim izin bergenini soradı. “Men mında Ukrainanıñ devlet menfaatlarına ve Ukraina Prezidenti Yanukoviç resmen ilân etken Ukraina yönelişine zıt eki plakatnı körmektem, – dedi Çubarov ve “Yanukoviç –Qırım-Rusiye”, şiarı, onıñ fikirine köre, iç olmağanda “Yanukoviç-Ukraina” dep yazılması kerek edi.

Qırım Yuqarı Şurasınıñ deputatı R. Çubarov Qırım parlamentiniñ reisine “özüniñ ayrı isteklerini Ukraina Prezidenti ve devletniñ kursına uyğun alda ifade etmesini tevsiye etti. “Bu plakatlarnı asmağa kim izin bergenini maña añlatmalarını, prokuratura ve Ukraina Telükesizlik hızmetini ise öz vazifelerini eda etmelerini rica etem”, – dedi Çubarov.

Qırım spikeri deputat Çubarovğa bu salon deputatlar salonı olğanını aytqanda Çubarov “Ya men de deputatım. Kelecek sefer men asqan şeylerni nasıl alır ekensiñiz men baqarım”, – dedi açuvnen Çubarov ve Konstantinovğa özüniñ konkret vazifesini eda etmesini tenbiyeledi. Qırım parlamentiniñ sessiyasında çıqışta bulunğan Refat Çubarov fraktsiyadaki zenaatdaşları ve kendi adından Ukrainanıñ ğarp adetlerini kütken hristian vatandaşlarını Hristos doğumı ve keleyatqan yañı yıl bayramınen hayırladı.

“Aynı zamanda siyasiy-içtimaiy vaziyet öyle ki, doğrusını aytqanda, bayram keyfi degil de keder duyğusı bar”, – qayd etti Çubarov. “Kurultay-Ruh” fraktsiyasınıñ başı emin ki, Qırımda kerçek dialog olmadan, şu cümleden siyasiy çoqluq ve siyasiy azlıq arasında, güya cemaat barışığı mevcut diye kösteriş yapabermek inqıraz ile yekünlenebilir.

“Zenaatdaşlar, çoqmilletli ve çoqdinli cemiyette, Qırım cemiyeti ise aynı böyle cemiyettir, o qadar çoq mesele bar ki, angileri sadece qol köterüvnen, olsun çoqluqnıñ qol kötermesinen, çezilmegenini añlamağa çağıram sizni, – dedi R. Çubarov. – Şunıñ içün de er bir normal demokratik devlette cemiyetniñ er bir azasınıñ aqlarını musaviy şekilde qorçalağan ve teminlegen bir çoq qanunlar ve usullar tesis etile. Bu pek müimdir”.

R. Çubarovnıñ sözlerine köre 2013 senesi Qırım Yuqarı Şurası öz faaliyetinde büyük yañlışlardan birini yaptı.

“Qıymetli meslekdeşler, sizler iş odası Yuqarı Şurada olmağan bir insannıñ emiri ile daimiy komissiyalarnıñ biriniñ erkânını deñiştirmek içün çoqluq olıp rey berdiñiz, – dep añlattı Çubarov. – Albu ki, biz başında er angi fraktsiya, olsun eñ az sayılı, Prezidiumda temsil etilmesi imkânına malik olacağı aqqında añlaşqan edik. Öyle de oldı. Soñra siz bizim razılığımıznı bile soramadan, “Qurultay-Ruh” fraktsiyası ile iç bir türlü söyleşüvler keçirmeden fraktsiyamıznıñ azasını çoquñızğa asılı ile yaqınca soyuna deñiştirdiñiz”

Qırım Yuqarı Şurasınıñ başı ve deputat korpusına hıtap eterek Refat Çubarov Qırım Yuqarı Şurasınıñ Milletlerara meseleler boyunca daimiy komissiyasınıñ reisi boyunca mesele ğayrıdan baqılması kerek dedi ve parlamentteki çoqluq Yuqarı Şurada olarnıñ fikirinden farqlı fikirlerni ifade etken deputatlarnıñ pozitsiyasını da esapqa almaqnı tevsiye etti. “Bu deputatlarnı da Ukrainanıñ vatandaşları olğan Qırım sakinleri sayladılar”- dep qayd etti R. Çubarov.

QMC YUŞ matbuat merkeziniñ fotoları