Refat Çubarov: «Qırım sevgisi» sergisi ayret ve sevinç menbasıdır»

15 Yanvar 2014

2014 senesi yanvar 15 künü Aqmescitte “Qırım sevgisi” sergisi açıldı. Tedbir çeşit janrlarda icat etken, qırımtatarlarnıñ halq sanatına, yarımadanıñ unikal tarihı ve medeniyetine sevgi beslegen, çeşit yaş ve çeşit milletlerge mensüp ressamlarnıñ teşebbüsi ile teşkil etildi.

“Qırım üslübi” leyhası çerçivesinde açılğan sergi teşkilâtçılarınıñ bildirgenine köre Qırımnıñ tarihı ve medeniyetine sevgi ve meraq olarğa bugünki şaraitlerde Qırım tamır halqınıñ qadimiy ananelerini ğayrıdan tiklemek ve inkişaf ettirmek imkânını bere.

Sergi leyhasınıñ müellifi, belli ressam Mamut Çurlu tarafından nağışçılıq variyetini ögrenüv boyunca pek büyük iş yapıldı, nağışlar tiliniñ sırları açıldı.

Sergide Meclis reisi Refat Çubarov, Meclis azaları Şevket Qaybullayev, Qurultay Teftiş komissiyasınıñ reisi Ali Özenbaş, ressamlar, sanatkârlar ve Qırım cemaatçılığı iştirak etti.

“Bugün ğayet aydın bir kün, em bu yalıñız tışta küneşli ve sıcaq ava olğanı sebebinden degil, – dedi Meclis reisi Refat Çubarov. – Er angi sergi ve ya da er angi mevzu qalplerge bu qadar quvanç bağışlap olamaz. Sıqı allarda, ayret duyğusı yanında nasıldır bir keder, telâş da ola. Amma bugün bu salonda men hayret ve içimdeki sevinçten ğayrı iç bir şey sezmeyim”

Meclis reisi Qırımnıñ kelecegi taqdim etilgen, Qırım sakinlerini bir arağa ketirgen bu serginiñ büyük emiyetini qayd etti. Meclis yolbaşçısı sergi musafirleri ve iştirakçilerinden böyle sergiler birleştirgeni ve demek böyle tedbirlerniñ sıqça ve er yerde keçirmek tekliflerini eşitkenini de ayttı.

Refat Çubarov sergi teşkilâtçılarına ve bilhassa, tedbirge kelgen ve icatkârlarnıñ eserlerinden ilham alğan seyircilerge teşekkürlerini bildirdi.

Öz nevbetinde Mamut Çurlu sergi üzerinde çalışqan er bir müellif ile tanış etip, sergide 40 ustanıñ işi taqdim olunğanını ayttı.