Refat Çubarov: Qırım akimiyeti memlekette yüz bergen deñişmelerni añlamaq iqtidarında degil

24 Fevral 2014

Meclis reisi Refat Çubarov Noman Çelebicihan hatırasına bağışlanıp keçirilgen Bütünqırım matem mitinginde seslendirilgen talaplarğa Qırım baş naziri Anatoliy Mogilövnıñ cevabına açuvlanğan pek çoq semetdeşlerniñ fevral 24 künü aqşam oña telefon açqanları aqqında ayttı.

R. Çubarovnıñ sözlerine köre bir çoq insan tekrar mitingge toplaşıp “Mogilövnıñ komandası ille nenen razı olmağanını soramaq”nı talap etkenler. Bu aqta Meclis reisi fevral 24-te matbuat konferentsiyasında bildirdi

“İnsanlar bu muracaatnı menfiy qabul ettiler. İlk-evelâ adamlarnı Qırım Nazirler şurasınıñ reisi doğrudan-doğru olmasa da, qırımtatarlarnı azırladıqları vaqialarnıñ qurbanları olabileceklerini aytıp qorquzğanı ziyade açuvlandırdı, – dep añlattı Meclis reisi. – Ekinciden, insanlarnı pek açuvlandırğan daa bir şey baş nazirniñ o, ve “onıñ Qırım komandası zor zamanlarda siz ile beraber olıp, beraber küreşecek, qıyınlıqlarnı yeñip, yarınki künni tüşünecekmiz”, degen sözleridir.

Meclis reisiniñ aytqanına köre mitingge çıqqan 15 biñden ziyade insan ve mitinge kelip olamağan daa onlarnen biñ insan ükümetniñ bugünki komandasınıñ işinen iç memnün degil.

“Tünevin mitingde biz “bu komanda” öz işinde qullanğan usullar – insanlarnı milliy mensüpligine köre “özümizniñkiler” ve “yabancılar”ğa bölüvi, regionlar partiyasınıñ zorbalığı, devlet hızmetçileri üzerinden zorbalıq – usulları aqqında çoq ve tafsilâtlı ayttıq, – dedi Çubarov. –A. Mogilöv ise “komanda siznen bizim bahtımız içün küreşmekni devam etecegini” tekrarlay. Biz devlet hızmetçilerine şunı tekrar bildirmek isteymiz ki, Qırımdaki vaziyetni talil etip, insanlarnıñ Bütünqırım matem mitinginde seslendirilgen talaplarını eşitsinler ve insanlarnıñ talaplarını añlasınlar, – dep qayd etti Meclis reisi ve fevral 24-ten başlap regional meclislerniñ reisleri Meclis reisiniñ avaleleri ve miting talaplarını yerine ketirmege başlamaq kerekligini ayttı.

“Qırımtatar halqı vekilleriniñ keñeş”i olmağan ve umumen iç bir türlü dialog qurulmağan Qırım regionlarınıñ rayon devlet memuriyetlerinde böyle keñeşlerni meydanğa ketirmek ve erkânlarına yerli sakinler saylağan regional meclis azalarını kirsetmek, böyle keñeşler resmen mevcut olğan regionlarda ise olarnıñ işlerini canlandırmaq qararları alındı.