Refat Çubarov: «Hayatta halqınen beraber olğan insan, vefatından soñ da onıñnen beraberdir»

04 December 2012

4 dekabr künü Ukrain muzıkalı teatrinde efsaneviy yırcı, Qırım ASSRde ve Özbekistanda nam qazanğan artist Sabriye Erecepova doğğanınıñ 100 yıllığına bağışlanğan tantanalı aqşam ötkerildi.

Onıñ icrasında er angi yır halq yırına çevrildi. Bütün ömürini sevimli halqına bağışlağan Sabriye Erecepova öz semetdeşlerine variyet olaraq halq yırına sevgini qaldırdı.

Aqşam Ukraina Yuqarı Şurası 2012 senesi iyül 5 qabul etken “Sabriye Erecepova doğğanınıñ 100 yıllığını qayd etüv aqqında” № 10438 Qararnı amelge keçirüv çerçivesinde teşkilâtlandırıldı. Aqşam Sabriye Erecepova aqqında vesiqalı filmden başlanıp, onda yırcınıñ dostları ve şegirtleri onıñ bitmez-tükenmez istidatını tarif ettiler.

Tedbirni kiriş sözünen Milliy Meclis reisiniñ birinci muavini Refat Çubarov ve Qırım Nazirler Şurası reisiniñ muavini Aziz Abdullayev açtılar.

“Qırımtatarlar içün Sabriye Erecepovanıñ adını tilge almaq bile büyük şereftir. Sabriye Erecepova – bu qırımtatar halqınıñ yıldızı, cetemen yıldızıdır”, – dep başladı çıqışını A. Abdullayev.

Aziz Abdullayevniñ bildirgenine köre Ukraina tışqı işler nazirligi Sabriye Erecepovanıñ naşını Özbekistandan Bağçasarayğa köçürmek aqqında qarar alğan.

“19 asırnıñ soñunda ve 20 asırnıñ başında halqımız ne qadar azap çekse de, bir sıra meşur şahıslarnı dünyağa ketirdi. Bu insanlarnıñ boynuna öz halqını qurtarmaq vazifesi tüşti”, – dedi Refat Çubarov. – Olardan birisi efsaneviy Sabriye ablamız edi”.

Meclis reisiniñ birinci muavini şunı da qayd etti ki, Sabriye Erecepova 1921 senesiniñ açlığını çekti, 1930 yıllırnıñ repressiyalarına oğratıldı, cenkni kördi ve 1944-te Vatandan sürgün etildi. “Hayatta halqınen beraber olğan insan, vefatından soñ da onıñnen beraberdir”, dep qayd etti R. Çubarov.

Kontsert programmasını Sabriye Erecepova çalışqan “Qaytarma” ansambliniñ artistleri devam ettirip, Sabriye Erecepovanıñ yırlarını icra ettiler.

Şunı hatırlatmalı ki, 2012 senesi iyül 5-te Ukraina halq deputatları “Sabriye Erecepova doğğanınıñ 100 yıllığını qayd etüv aqqında” № 10438 Qararnı qabul ettiler. Onıñ müellifi Ukraina halq deputatı Mustafa Cemilevdir.