Refat Çubarov: «Halqnıñ menfaatlarını kim ve nasıl sıfatta taqdim etecegini belgilemege tek qırımtatar halqınıñ aqqı bar»

14 Noyabr 2011

Qırımtatar halqı Meclisi reisiniñ birinci muavini Refat Çubarov milliy areketniñ bazı iştirakçileriniñ noyabr 14 künü matbuat konferentsiyasında Meclis reberleriniñ vekâletlikleri hususında seslendirgen “M.Cemilev ve R.Çubarov qırımtatar halqını taqdim etmege, onıñ adından ne Ukrainada ve ne de halqara seviyede çıqışta bulunmağa aqları yoqtır” kibi beyanatlarını izaatladı.

“Bunıñ içün er beş yılda qırımtatarlar Qurultayğa delegatlarnı saylay. Onıñ sessiyalarında 250 delegat qırımtatar halqı inkişafınıñ bütün printsipial meseleleri boyunca qarar qabul ete, Qırımtatar halqı Meclisi ve diger organlarınıñ erkânını şekillendire, olarnıñ reberlerini tasdiqlay.

Şunı da qayd eter edim ki, bütün bu iş bülletenlernen gizli rey berüv yolunen yapıla. Aynı böyle şekilde Qurultay delegatları Meclisniñ bütün erkânına ya da ayrı azalarına, Reisine ve muavinlerine işançsızlıq bildire bileler.

Bu muracaatnı imzalağan 27 insanğa kelsek, olarnıñ arasında çeşit-türlü soyları – repressiya yıllarında cesürlik köstergenler de, olarnı açıqtan-açıq qaralağan, akimlerge çaqqanlar da bar.  Ola bilir ki, öz muracaatları altında olar çeşit sebeplerge köre Meclis ve onıñ reberleriniñ işinen memnün olmağan daa bir qaç yüz insannıñ imzasını toplarlar.

Men ise olarğa 2012 senesi olacaq Qurultayğa yañı delegatlarnı saylavda iştirak etmelerini, Qurultayğa delegat olaraq saylanmalarını(eger de saylavcılar olarğa qoltutsalar) ve bütün meselelerni 250 delegat sırasında al etmelerini tevsiye eter edim.

Şimdilik ise, kene de evel yapqanım kibi muhaliflerimizge muracaat etem – vaqtı-vaqtınen qozğalğan is-duyğularnen sıñırlanmadan, halqqa kündelik konkret ve faydalı işleriñiznen hızmet etiñiz.

Teessüf ki, bizim tenqidçilerimizniñ elinden yalıñız qırımtatar halqı milliy öz-özüni idare etüv organına çirkef tökmek, qırımtatarlarnıñ iç olmağanda bir qısmını er kün öz aq-uquqlarını qorçalamaq kibi işten çalğıtıp, olarnı özara davağa celp etmek kele”, – dedi Qırımtatar halqı Meclisi reisiniñ birinci muavini Refat Çubarov.