Refat Çubarov: Halqara forum mıtlaqa 2014 senesi mayıs 18 – qırımtatar halqı sürgünliginiñ 70 yıllığı arfesinde keçirilmek kere

04 Dekabr 2013

2013 senesi dekabr 4 künü Kiyevde Qırımtatar halqı Meclisiniñ reisi Refat Çubarov ve Ukraina halq deputatı Mustafa Cemilev OSCE Milliy azlıqlarnıñ işleri boyunca aliy komissar Astrid Tors ile körüştiler.

Körüşüvde bunıñ kibi de Aliy komissar ofisiniñ üyken mesleatçısı Bob Din ve Ukraina halq deputatınıñ yardımcısı Aleksey Skorik iştirak ettiler.

Qararnen eki saat devam etken körüşüvde taraflar Qırımdaki vaziyet ve qırımtatar halqınıñ alına dair mesele ve bunıñ kibi de 2013 senesi noyabr 21 künü Ukraina Nazirler Kabineti Ukraina ve Avropa Birliginiñ birleşmesi aqqında añlaşmanıñ imzalanmasına azırlıqnı toqtatıp turmaq boyunca qararından soñ meydanğa kelgen siyasiy inqıraz ve Qırımtatar halqınıñ aqlarını tiklev boyunca Halqara forumnı keçirüvniñ istiqballeri muzakere etildi.

Körüşüv iştirakçileri devlet ve cumhuriyet akimiyeti qırımtatarlarnıñ vekâletli organı ile dialogı mümkünligine dair meseleler de tafsilâtlı baqıldı, Meclis yolbaşçısı qayd etti ki, qırımtatar halqınıñ öz tarihiy Vatanından sürgün etilgeniniñ 70 yıllığıt arfesinde qırımtatarlar ukrain devleti ve Ukrainada qırımtatarlar meselesiniñ çezimine celp etilgen halqara teşkilâtlar, birinci nevbette OSCE ve Avropa Birliginden tam cevaplarnı alması pek müimdir.

“Qırımtatar halqı Ukrainanıñ “Milliy mensüpligine köre sürgün etilgen şahıslarnıñ aqlarını ğayrıdan tiklev aqqında” Qanun mıtlaqa qabul etilecegini beklemekte”, – dedi R. Çubarov. – Biz ümüt etemiz ki, Ukraina eñ yaqın zamanda 2014 senesi mayıs 18 – qırımtatar halqı sürgünliginiñ 70 yıllığı arfesinde Halqara forum keçirilmesi boyunca öz pozitsiyasını seslendirir”.

Ukraina halq deputatı M. Cemilev OSCE Aliy komissarı ile subette dedi ki, akimiyet qırımtatar halqına akimiyet menfaatlarından ve siyasiy köñünkturağa bağlı obyektke kibi degil de , Ukraina siyasiy, iqtisadiy ve içtimaiy ayatınıñ subyektlerinden biri sıfatında yanaşması zarur.

Öz nevbetinde OSCE Aliy komissarı Astrid Tors ofis OSCE azası olğan Ukrainadaki vaqialarğa, bilhassa insan ve millet aqalarını qorçalav saasındaki vaziyetni diqqatnen közetecegini bildirdi. Aliy Komissarnıñ söylegenine köre onıñ ve onıñ komandası içün qırımtatarlar keçken yol pek qıymetlidir.

“Men añlayım ki, qırımtatar meselesi çeziminiñ sozulması insanlar, bilhassa gençler arasında sabırsızlıq ve öz aqlarını qoruvnıñ başqa yollarını araştırmasına siltem olur”, – dedi Astrid Tors.

Subetdeşlerine hıtap eterek Aliy Komissar qırımtatarlarnıñ liderleri kelecekte de demokratiya printsipleri esasında iş köreceklerine işanç bildirip, OSCE Aliy komissarı tarafından Nansen mukâfatınıñ saibi olğan Mustafa Cemilev ile tanış olğanını kendisi içün büyük şeref, dep bilgenini qayd etti.

Malümat içün:   2013 senesi yazda Finlândiyanıñ migratsiya ve Avropa bağları boyunca sabıq nazir Astrid Tors OSCE Milliy azlıqlarnıñ işleri boyunca aliy komissar olaraq saylandı. A. Tors Avropa parlamentiniñ azası da oldı. Onıñ Aliy Komissar vazifesine tayinlenmesi OSCE azası olğan 57 devletniñ umumiy qararıdır. Bu vazifede üç yıl çalışacaq Astrid Torsnıñ iş müddeti 2013 senesi avgust 20-de başlandı.