Refat Çubarov emin ki, akimiyet kendisi toqtamalı, çünki onıñ

01 March 2013

Qırımtatar halqı Meclisi reisiniñ birinci muavini, Qırım Yuqarı Şurasında “Qurultay-Ruh” fraktsiyasınıñ başı Refat Çubarovnıñ fikrince akimiyetniñ ögünde bütün bir halqnıñ meselesi turıp, o şu meseleni al etmege istemese, bu halqnıñ içinden özüne oñaytlı insanlarnı çekip çıqara. Bu aqta o fevral 28 künü o ATR telekanalında “Gravitatsiya” tok-şouda akimiyet ve qırımtatar halqınıñ munasebetlerine dair mesele muzakere etilgende ayttı

“Bugün akimiyetnen qırımtatar halqı arasındaki işbirlik akimiyetniñ kendisiniñ isteginen şekilini deñiştirdi, – qayd etti Çubarov ve bu deñişme tüşünip-taşınılğan belli bir maqsadlarnen yapılğanını da qoşumca etti.

“Yazıq ki, “Gravitatsiya” tok-şousına davet etilgen Rustam Temirgaliyev kelmedi. Bugünde-bugün o, Qırımda ve Kiyevde qırımtatarlarğa nisbeten işlengen siyasiy tehnologik fikirlerni seslendirgen baş borazan olaraq bellidir. Yazıqlar olsun ki, studiyada Lentun Bezaziyev de yoqtır. Belli ki, Ukraina Prezidenti yanındaki Qırımtatar halqı vekilleri şurasınıñ reisi olğan Bezaziyevniñ kabinetinde bu ğayeler, şu cümleden “ne zaman Temirgaliyev Aziz Abdullayevniñ yerini alacaq” kibi mesele sınavdan keçirile, – dedi Refat Çubarov.

Meclis reisiniñ birinci muavini Refat Çubarov emin ki, bugün akimiyet areketlerini kendisi toqtatmalı, çünki onıñ “ğayeleri” angi derecege yetecegini tek özü ve oña hızmet etken insanlar bile

“Er angi akimiyet tamır halqlarnen munasebet qurğanda şu halqlarnıñ özleri meydanğa ketirgen milliy qurum ve gruppalarnen çalışması kerek”, – dedi Çubarov. Siyasetçi daa bir kere şunı hatırlattı ki, Qırımtatar halqınıñ Meclisi ve Qurultayı, olarğa kim nasıl munasebette bulunğanından qatiy nazar, – bugünde bugün yekâne bir alettir. Başqasını qırımtatarlar daa keşf etmediler, işbu milliy akimiyet institutlarını qırımtatarlarnıñ kendileri seçtiler ve saylavdan-saylavğa olarnı mükemmelleştirmege tırışalar.

Bunıñ kibi de Refat Çubarov emin ki, akimiyet qırımtatar halqını öz Vatanında aqsımlamağa qarar bergenine baqmadan qırımtatarlar buña munasip cevap bermege iqtidarları yeter.