Refat Çubarov Çehiya Tışqı işler naziriniñ muavini Tomaş Dub ile körüşti

19 Oktâbr 2011

2011 senesi oktâbr 19 künü Qırımtatar halqı Meclisi reisiniñ birinci muavini, Bütündünya qırımtatarlar kongressiniñ prezidenti Refat Çubarov Çehiya Cumhuriyeti Tışqı işler naziriniñ muavini Tomaş  Dub ile körüşti. Körüşüvde Çehiyanıñ Ukrainadaki Vefqulade ve Tolu vekâletli elçisi İvan Poçuh, Çehiyanıñ Ukrainada elçiliginiñ siyasiy meseleler boyunca mesleatçısı Lüboş Veselu, Çehiyanıñ Donetskteki baş konsulı Ondrey Moravek, Meclis tışqı alâqalar bölüginiñ başı Ali Hamzin iştirak etiler.

Körüşüvde qırımtatarlarnıñ qaytuvı ve yerleşüvinen bağlı meseleler muzakere etilip, Halqara forumğa azırlıqnıñ ketişatında da toqtaldı. 

Çehiyalı musafirler öz nevbetinde Qırım ve Çehiya arasında iqtisadiy ve  medeniy alâqalarnı kenişletüv boyunca plan ve istiqballeri aqqında ikâye ettiler. Musafirler bunıñ kibi de Qırım Nazirler şurası Vışegorodskaya dörtlügi azaları olğan devletlerniñ teşebbüsine qoltutqanını ayrıca memnünliknen qayd ettiler.

Körüşüvniñ soñunda Refat Çubarov  Çehiya tışqı işler naziriniñ muavini Tomaş Dub  ve onıñ ile beraber olğan şahıslarnı qırımtatar halqınıñ vaziyetine bifarq olmağanları ve qırımtatarlarnı yerleştirüvde Ukrainağa yardımcı olmağa tırışqanları içün teşekkür bildirdi.