Refat Çubarov: «Bütündünya qırımtatarlar kongressi 2013 senesi küzde olması içün imkânımız olğanı qadar er şeyni yapamız»

08 May 2013

“Halqara forum deyerlik azır, onıñ keçirilmesinde em Avropa Birligi, em OSCE, bunıñ kibi de Ukrainanıñ bir çoq ortaq devletleri menfaatdarlar. Yalıñız Ukraina akimiyeti tarafından soñki adım yetişmey”, – dedi Bütündünya qırımtatarlar kongressiniñ prezidenti Refat Çubarov Qırımtatar halqınıñ aqlarını tiklev, Ukrainada onıñ telükesizligi ve inkişafını teminlev boyunca halqara forum ve Bütündünya qırımtatarlar kongressiniñ ekinci toplaşuvı aqqındaki sualge cevap berirken.

Bütündünya qırımtatarlar kongressi aqqında Refat Çubarov mayıs 4 künü qırımtatar diasporası vekilleri ve Meclis azalarınıñ körüşüvinde kongress keçirilecek yer ve kününi muzakere ettiler, dedi.

“Toplaşuv iştirakçileri qarar almaqnı Qırımtatar halqı Qurultayınıñ yañı erkânı ve Bütündünya qırımtatarlar kongressi Koordinatsion keñeşine qaldırdılar.

Bütündünya qırımtatarlar kongressi 2013 senesi küzde olması ve Bütüdünya kongress uquq alanında halqara teşkilât olaraq pekitilmesi içün imkânımız olğanı qadar er şeyni yapamız”