Refat ÇUBAROV: Biz milliy sınıflar ve şübesiz, milliy mektepler açılması içün çalışacaqmız

07 Noyabr 2013

Noyabr 7 künü Meclis reisi Refat Çubarov Macaristannıñ Ukrainadaki Elçiliginiñ 1-nci kâtibi Timeyya Vayon ile körüşti.

Vayon hanımğa Macaristan Cumhuriyetiniñ Aqmescitteki Elçiliginiñ birinci kâtibi Viktor Pavlenko refaqatlıq yaptı.

Meclisni körüşüvde Meclis reisiniñ muavini Nariman Celâl, tışqı alâqalar bölüginiñ başı Ali Hamzin ve Kâtibiyet başı Dilâver AKİYEV temsil ettiler.

Macaristannıñ Ukrainadaki Elçiliginiñ 1-nci kâtibi Timeyya Vayon körüşüvniñ başında Refat Çubarovnı Meclis reisi vazifesine saylanğanı ile hayırladı ve qırımtatar halqı oğrunda semereli çalışmasını tiledi. Öz nevbetinde Refat Çubarov macaristanlı diplomatqa 2013 senesi oktâbr 26-27 künleri olıp keçken 6-ncı çağırılış Qurultay 1-nci sessiyasınıñ neticeleri aqqında malümat berdi ve Meclisniñ qurumı ve qırımtatarlar vekâletli organınıñ fazifelerinen tanış etti.

Timeyya VAYONnıñ söylegenine köre, bugünde-bugün Ukrainada, Karpatlar artında 150 biñ civarında macarlar yaşap, milliy azlıqlarnıñ aqları ve serbestligini qorçalav meseleleri qırımtatar halqı içün olğanı kibi müimdirler.

“Macaristan sadece Ukrainanıñ bayağı macarlar yaşadığı qomşusı degil de, aynı zamanda em qırımtatarlar, em macalarlar içün bir seviyede aktual meseleler mevcut oldığı bir yerdir, – dedi Meclis yolbaşçısı. – İlk-evelâ, bu milliy tasil ve ana tilini ögrenüv meselesidir. Biz milliy mektepler ve, şübesiz, ukrain ve qırımtatar tilinde oqutılğan mekteplerniñ açılmasını isteymiz”.

Macaristannıñ Ukrainadaki Elçiliginiñ 1-nci kâtibi Timeyya Vayon Zakarpatye vilâyetinde yaşağan macarlar çektigi bir sıra qıyınlıqlarğa da diqqatnı celp etti. Timeya VAYON hanım seslendirgen misaller sırasında macar tili ocalarınıñ yetişmegenidir. Ayrıca şu da qayd etildi ki, Macaristandan Ukrainağa oquv qullanmalarını ketirmekni yasaqlağan ukrain qanunları bu meseleni suniy şekilde daa da mürekkepleştire.

Körüşüvde baqılğan meseleler sırasında taraflar Qırım ve Ukrainada siyasiy-içtimaiy vaziyetni talil etip, qırımtatarlar sürgünliginiñ 70 yıllığı arfesinde qırımtatarlarnıñ meseleleri boyunca halqara forumnı keçirüv istiqballerini muzakere ettiler.

“Halqara forumnıñ keçirilmesi qırımtatarlar içün, bunıñ kibi de Qırımnıñ tamır halqınıñ ğayrıdan itklev meselelerini kesen-kes çezmege azır olğan Ukraina içün ğayet zarurdır”, – devam etti Meclis reisi R. Çubarov. – Bunıñnen birge şunı da qayd etti ki, noyabrde Vilnüste Ukraina Avropa Birligi ile birleşme aqqındaki añlaşmanı imzalağanınen Meclim Avropa Birligi çerçivesinde tamır halqlarnıñ ve milliy azlıqlarnıñ, şu cümleden qırımtatarlarnıñ problemleri boyunca monitoring gruppası meydanğa ketirilmesi içün teşebbüs köstermekni planlaştıra.

“Avropa parlamenti devletleri gruppasına Vışegrad gruppası ve Baltıq devletlerini kirsetmek de çoq müim, çünki mezkür devletlerniñ halqları sovet rejimi qanlı ve şiddetli siyasetiniñ eziyetlerini öz boynunda çektiler”, – dedi Meclis tışqı alâqalar bölüginiñ başı Ali HAMZİN.

Körüşüvniñ soñunda taraflar qayd ettiler ki, Avropa Birliginen añlaşmanıñ imzalanması Ukrainağa Avropa halqları ailesinde munasip yer almaq imkânını berir ve demokratik degerlikler devletniñ cemiyetine aşlanır.