Refat Çubarov: Bir gecede eki provokatsiya…Qırımda kim ve ne sebepten dava çıqarmaq istey?

01 December 2012

2012 senesi noyabr 30-dan dekabr 1-ge keçer gecesi Qırımda bir qaç saat içinde qırımtatarlarğa nisbeten eki ücüm yapıldı. Gece saat 2-lerde şaatlarnıñ bildirgenine köre Moskva yolu kenarında Molodöjnoye qasabasınıñ yaqınındaki “narazılıq tarlaları”na taba 100-ge yaqın yaşlar, olarnıñ bir qısmı “kazaklar” ve diger qısmı topraq paylarınıñ saipleri, areket ettiler.

Topraq payları bu insanlarğa qanunsız berilgenini bu yerlerde endi qurulacaq evleriniñ temelini qoyğan qırımtatarlar iddia eteler. Gece “musafirleriniñ” maqsadı kendileriniñ söylegenine köre davalı yerge öz aqlarını “ğayrıdan tiklemek” eken. Amma ne içündir aydutlar, olarğa şunıñ qadar da militsiya ve “Berkut” küçleri refaqatlıq yapmasını teminlegen Qırım militsiyasınıñ yolbaşçıları bu işni gece amelge keçirmekni doğru, dep tanığanlar.

100-den ziyade muvaqqat evçikler yıqtırılmasınıñ şaatları olğan 20-ye yaqın qırımtatarı buña qarşı areket etmediler. Çünki gece yağmanıñ baş maqsadı dava qoparmaq ve bunıñnen davanı “yatıştırmağa” azır olğan küçlerni işke qoymaq olğanını añladılar.

Al-azırda adise yüz bergen yerde bir qaç militsiya hadimi tura. Olar mında çatışma olmasına yol bermemek içün qaldırılğanlar.

Bu vaqiadan eki saat keçer-keçmez Aqmescitte Cuma Cami qurulacaq yerni qaravullağan bekçige tecavuz etilip, onıñ vagonçığına patlayıcı maddenen tolu şişeler atıldı. Aqibette bir şişe sınıp, vagonçıq yanıp başlay. Qaravul ateşni söndürip, Qırım musulmanlarınıñ müftisine haber berdi. Adise yüz bergen yerge acı Emirali Ablayev ve Meclis reisiniñ birinci muavini Refat Çubarov acele yetip keldiler.

Patlav aqqında militsiyağa haber etilgen soñ, Meclis reisiniñ birinci muavini Refat Çubarovnıñ bildirgenine köre patlav olğan yerge Ukraina İçki işler nazirliginiñ Qırımdaki taqiqatçıları da kelgenler.

“Saat 16.00-de Ukraina İçki işler nazirliginiñ Qırımdaki idaresi İnternette http://www.crm-mia.gov.ua/ru/news/ saytında Yaltinskaya, 22-de olğan adise aqqında resmiy haber yerleştirgen, amma Molodöjnoye qasabasınıñ yanındaki “narazılıq tarlasında” gece yüz bergen yağma aqqında iç bir türlü haber yoqtır”, – dep yaza Refat Çubarov özüniñ saifesinde Facebookta.

“Şimdilik men qırımtatarlarına qarşı gece yapılğan ücümniñ tahminlerini aşkâr etmeyim, – dey Refat Çubarov. – lâkin, şunı qayd etmege isterdim ki, daa bir qaç kün evelsi Qırım Yuqarı Şurasınıñ minberinden turıp uquqqoruv organlarınıñ yolbaşçılarını Qırımda nefret qozğamaq areketinde bulunğan marginal siyasetçiler faalleşkenine diqqat etmelerine çağırğan edim”.

Refat Çubarov “Qırımda kim ve ne sebepten dava çıqarmaq istey?” sualine cevapnı uquqqoruv organları bermek kerekliginde emin.