Refat Çubarov: Aqmescitniñ merkeziy meydanında miting er angi maniağa baqmadan olacaq

06 Dekabr 2013

2013 senesi dekabr 6 künü Aqmescitte regional meclislerniñ reisleri iştirakinde Milliy Meclisniñ kenişletilgen toplaşuvı olıp keçti.

Kün tertibine 5 mesele qoyuldı:

1. Halqara insan aqları kününe bağışlanğan Bütünqırım mitingine azırlıqnıñ ketişatı aqqında;

2. Lenin rayonında regional konferentsiya keçirüv aqqında;

3. Meclis yolbaşçıları ve idare reberleriniñ Qurultay delegatları, yerli milliy idare organlarınıñ reisleri, maalliy şuralar deputatları ve musulman cemiyetleriniñ reislerinen “zonal” toplaşuvlar keçirüv aqqında;

4. Qırımtatar halqı Meclisiniñ vaqtınca reglamentini tasdiqlav;

5. Qırımtatar halqı Meclisiniñ qurum bölükleri aqqında Nizamnıñ tasdiqlanması.

Halqara insan aqları kününe bağışlanğan Bütünqırım mitingi meselesi boyunca çıqışta bulunğan Meclis reisi Refat Çubarov Aqmescitniñ merkeziy meydanında miting er angi maniağa baqmadan olacaq, dedi.

Jurnalistlerge bu hususta izaat berirken Refat Çubarov şöyle dedi: “Körgeniñiz kibi aynı problem – em Kiyevde, em Aqmescitte naratnı qoyalar. Şu munasebetnen olar (Aqmescit şeer icra komiteti) evelden ilân etilgen mitingni bizge Salğır bağçasında keçirmekni tevsiye eteler. Biz ise Aqmescit şeer icra komitetiniñ bu teklifini esassız ve uydurılğan, dep sayamız. Eñ müimi şunda ki, biz bir aftadan berli miting merkeziy meydanğa keçecegini er keske ilân etkenimizden soñ şeericrakomnıñ bu tevsiyelerine riayet etip olamamız”.

Bunıñ ki bi Refat Çubarov dedi ki, miting teşkişlâtçıları naratqa zarar tiysetmeden mitingniñ davasız, tınç keçmesini temin eterler.

Meclis azaları Lenin regional konferentsiyasını 2013 senesi dekabr 21-de keçirmekni qararlaştırdılar. Regional konferentsiyasında Lenin regional meclisiniñ reisi saylanacaq.

Meclis reisiniñ muavini Zaur Smirnov toplaşuv iştirakçilerine Meclis yolbaşçıları ve idare reberleriniñ Qurultay delegatları, yerli milliy idare organlarınıñ reisleri, maalliy şuralar deputatları ve musulman cemiyetleriniñ reislerinen 2013 senesiniñ soñuna qadar “zonal” toplaşuvlar keçirüv aqqında aytırken, birinci böyle toplaşuvnıñ Saqta dekabr 7 künü keçecegini haber etti. Toplaşuvlar cedvelinen ise Meclisniñ saytında tanış olmaq mümkün.

Meclisniñ vaqtınca reglamenti esas olaraq qabul etildi. Meclis prezidiumına bazarertesi dekabr 9 künü Meclis ve Qurultay Teftiş komissiyasınıñ tüzetüvleri esapqa alınğanı alda dekabr 9 künü Vaqtınca reglamentniñ soñ şekilini qabul etmek avale olundı.

Qırımtatar halqı Meclisiniñ qurum bölükleri aqqında Nizam da esas olaraq qabul etildi. Tüzetüv ve qoşumcalar ile mezkür nizam Meclisniñ kelecek toplaşuvında tasdiqlanacaq.

Meclis toplaşuvında musafir olaraq bulunğan Halq areketi Qırım ştabınıñ eş koordinatorı Sergey Kovalskiy çıqışta bulunıp, dekabr 7 künü Ukraina yevrointegratsiyası içün nevbetteki miting keçirilecegini haber etti ve er kesni iştirak etmege çağırdı.

Esas meselelerniñ muzakeresinden soñ Kiyevde Mustaqillik meydanındaki vaziyet baqıldı. Meclis reisiniñ muavini Ahtem Çiygoz Kiyevde al-azırda ne qadar qırımtatarlar bulunğanı, narazılıq aktsiyanıñ başından qaç adam iştirak etkeni aqqında malümat berdi.

Bunıñ kibi de o, qayd etti ki, Ukraina yevrointegratsiyası içün aktsiyada iştirak etmek içün Kiyevge çoq adam ketmege istegenini bildirdi.