Refat Çubarov: Aqmescit belediyesi sürgünlik qurbanlarına sayığısızlıq kösterdi

17 April 2013

Meclis reisiniñ birinci muavini, Qırım Yuqarı Şurasında “Qurultay-Ruh” fraktsiyasınıñ başı Refat Çubarov “Qırım paytahtında sürgünlik qurbanlarına abide qoymaq” boyunca Aqmescit şeer şurasınıñ icra komiteti tarafından keçirilgen soravnı tenqidge oğrattı. Bu aqta “Argumentı nedeli – Krım” informatsion agentligi haber ete.

Mahsus işlengen anketa üç sualden ibarettir:

– Qırımnıñ paytahtında sürgünlik qurbanlarına abide qoymaq kerek dep sayasıñızmı? ( cevap variantları EBET ve YOQ)

– Bu abide repressiyalar devrinde zarar körgen bütün halqlarnıñ hatırasına qoyulmalımı? ( cevap variantları EBET ve YOQ)

– Abide qayerde turmaq kerek (cevap variantları Lenin adına bağça, Salğır parkı ya da öz variantıñıznı teklif etiñiz)

Sorav yaşlar cemaat teşkilâtlarınıñ faalleri tarafından şeerniñ merkeziy soqaqlarında, Kuybışev, Merkeziy bazar, Moskva meydanı, Demiröl vokzalı, “Silpo” tükânı qarşısında keçirilecek. Er bir istekli soravda iştirak etip, anketanı şahsen toldura bile.

“Sualler, soravnı teşkil etüv, sorav keçireceklerniñ seçilmesinen şeer akimleri sürgün etilgen qırımtatarlar ve Qırımnıñ diger milletleri qurbanlarınıñ hatırasına abideni sanki cemaatnıñ fikirine esaslanıp qoymaq istegenlerini kösteriş yapmaq niyetlerinden delâlet bere. Sorav neticeleriniñ nasıl olacağını ve sorav cemaatnıñ fikirini aslı da aks etmeycegini kün evelden söylemek mümkün.

Teklif olunğan sualler ise qırımtatar halqınıñ öz toprağından sürgün etilgen ve sürgünlikte elâk olğanlarğa abide tiklemek qanuniy aqqı ve niyetini esapqa almaylar. Bes-belli soravnıñ teşkilâtçıları, da daa doğrusı akimiyet, sorav neticelerine sıltap soñundan böyle abide qoyulmasına mania olurlar dep belleyler.

” Bu abide repressiyalar devrinde zarar körgen bütün halqlarnıñ hatırasına qoyulmalımı? ( cevap variantları EBET ve YOQ)” degen sual ise cemaatnıñ diqqatını milliy mensüpligine köre sürgün etilgen qırımtatarlar halqınıñ, Qırımda yaşağan ermeni, bulğar, urum ve nemselerniñ başına tüşken felâket aqibetlerini añlamaqtan çalğıtmaqtır. Qanunsız yaqalav, qurşunlav, kulaklaştıruv kibi cezalar keçken asırnıñ 20-30-ncı yıllarında

Qırımnıñ bütün sakinlerine toqundı. Stalin repressiyaları qurbanlarınıñ hatırası ebediyleştirilmeli, buña kimse itiraz etmez, amma er kesni bir abide içine qoşmaq şu qurbanlarnıñ ruhuna nisbeten sayğısızlıq degilmi?

Aqmescit şeer akimleri güya eyi niyetlerde bulunğan kibiler, asılında ise qırımtatar halqı ve diger millet qurbanlarınıñ hatırasına, umumen Qırım cemaatına sayğısızlıq kösterdiler. Eñ kederlisi şu ki, bu areketni olar bile=bile ve uzaqnı közde tutaraq yaptılar.

Çünki qırımtatar halqı sürgünliginiñ qurbanlarına qoyulacaq abideniñ yeri da keçken asırnıñ 90-ncı yıllarında belgilengen edi. Demiröl vokzalı qarşısındaki bağçada musulman diniy qaidelerine köre hatıra taşı qoyulıp, er sene onıñ yanına toplanğanlar sürgünlikte ölgen yaqınlarını duanen añalar.

Sürgünlikte ebediy qalğanlar, Vatan içün küreşte canlarını feda etkenlerniñ cesürligi simvolı olğan abide de aynı şu yerde qoyulacaq!”, – dep izaat berdi Refat Çubarov.