Refat Çubarov Frenkistan Milliy Radiosınıñ jurnalistlerinen körüşti

19 February 2025

Qırım işğaliniñ 11-inci yıllığı arfesinde, Ukrainada uzun vaqıt devamında çalışıp, Rusiye-Ukraina cenkiniñ eñ qızğın yönelişlerinden birinde Milliy Frenkistan radiosı (Radio France) içün haber etken Frenkistan jurnalisti Nıkolâ Teyyar ve taqımı Qırımtatar Milliy Meclisiniñ reisi Refat Çubarovnen körüşti.

AQŞ ve Rusiye arasında aytışmalarnıñ başlanması ve Prezident Trumpnıñ soñki beyanatları aqqında sualge izaat berip, Refat Çubarov, Qırımnı işğalden azat etüv meselesi – Ukraina devletiniñ ve bütün medeniy dünyanıñ yaşayış qabiliyeti meselesidir, dep qayd etti. Qısqadan aytqanda, halqara munasebetlerde daa ne üstün olacaq – uquqnıñ küçümi ya da küçniñ aqqımı?

“Dünya Rusiyeniñ şartlarını qabul etse, bu, Putinniñ ukrain ve qırımtatar halqlarınıñ yoq etilmesine bağışlanğanını ifadeleycek”, – dedi Çubarov.

Refat Çubarovnıñ fikrine köre, iç bir ukrain ükümeti, topraq teslimatları olsa, barışıqqa imza atmaz, çünki bu Ukraina devleti içün felâketli olacaq. Ukrainanıñ halqı topraqlarını ğayıp etmege razı olmaycaq ve silâlı küreşini devam etecek.

“Cenk bar, yüzlernen meskün yerler viran etildi, 6 milliondan çoq ukrain qaçağı çetelde buluna ve bularnıñ episi BMniñ Havfsızlıq Şurasınıñ daimiy azası olğan memleketniñ areketleri sebebinden yüz bere. Aksine, AQŞ, demokratiya qalqanı sayılğan memleket, istilâcı ve banditniñ tarafını tuta”, – dedi Meclisniñ reisi.

Radio France çoq millionlı diñleyicisine muracaat etip, Meclis lideri memleketiniñ, Frenkistannıñ kelecegi aqqında tüşünmege çağırdı: “Bu, menim samimiy tilegim, çünki bilem ki, eger siz Frenkistannı Avropanıñ üzerinde kerçekten üküm sürgen Rusiye telükesinden qorçalamaq kerekligini añlasañız, Ukraina mudafaasından Vatanıñıznı qorçalamağa mecbur olacaqsıñız”.