Refat Çubarov Frenkistannıñ Ukrainadaki muvaqqat vekâletlisinen körüşti

11.08.2025

2025 senesi arman ayınıñ 11-de Ukrainadaki Frenkistan Elçihanesinde Qırımtatar Milliy Meclisiniñ reisi Refat Çubarovnen Frenkistannıñ Ukrainadaki işlerinde vaqtınca vekâletli Sebastian SÜRENniñ körüşüvi olıp keçti.

Körüşüv devamında Refat ÇUBAROV Sebastyan SÜRENni Rusiye Federatsiyası tarafından işğal etilgen Qırımdaki vaziyet, Rusiye işğalcileri tarafından qırımtatar halqına qarşı yapılğan taqip ve repressiyalar aqqında haberdar etti.

Bundan ğayrı, subet iştirakçileri soñki vaqialar ve cenk areketleriniñ toqtatıluvı ve Ukrainağa qarşı Rusiye istilâsınıñ toqtatıluvı aqqında muzakereler boyunca çeşit teşebbüsler aqqında fikirlerinen paylaştılar. Bu qısımda Refat ÇUBAROV Frenkistannıñ Ukrainada muvaqqat vekâletlisi Sebastien SÜRENge Qırımtatar Milliy Meclisiniñ Qırımnı Rusiye toprağı olaraq tanımaq ıntıluvlarını – ne de-fakto, ne de-yure, ne de kim tarafından yapılsa olsun – qabul etmege dair nazar noqtasını añlattı.

Rusiye Federatsiyasınıñ İnterpolğa muracaatınen Frenkistanda tutulğan Ukraina vatandaşı İlnur ŞAĞAYEVnen bağlı vaziyet ayrıca baqıldı.

Rusiye Federatsiyası tarafından Ukraina vatandaşı, işğal etilgen Qırım sakini, qırımtatar İlnur ŞAĞAYEVniñ İnterpol vastasınen taqip etilüvine dair bütün belli olğan vaziyetlerni añlatıp, Refat ÇUBAROV subetdeşi Sebastyan SÜRENniñ diqqatını Rusiye tarafınıñ Ukraina vatandaşını Rusiye toprağına ekstraditsiya etmek talabınıñ qanunsızlığına celp etti.

Ukrainada Frenkistannıñ vaqtınca vekâletlisi Sebastyan SÜREN Refat ÇUBAROVnı işandırdı ki, Frenkistan adliyecisi Ukraina vatandaşı İlnur ŞAĞAYEVniñ tutuluvınen bağlı bütün şaraitni belgileycek ve Frenkistan qanunlarına köre qarar alacaq.

Körüşüvniñ soñunda Refat Çubarov Frenkistannıñ Ukrainadaki Fevqulâde ve Temsilci Gayel VESYERge tatilden qaytacaq soñ Qırımtatar Milliy Meclisine kelmege davet etti.