Refat Çubarov Ahmed Zakayevnen körüşti

18 February 2025

Salı künü, kiçik aynın 18-nde, Kıyivdeki Qırımtatar Milliy Meclisiniñ ofisini Çeçen İçkeriya Cumhuriyetiniñ Ükümet Reisi Ahmed Zakayev ve İçkeriya Cumhuriyetiniñ mudafaa naziri, divizion general Muhammed Mutalipov ziyaret ettiler.

Ahmed Zakayev qayd etti ki, Çeçen İçkeriya Cumhuriyeti Ükümetiniñ Qırımtatar Milliy Meclisinen sıq işbirligi qırımtatar ve çeçen halqları arasında tarihiy eyi qomşu munasebetleriniñ pekitilmesine ve tek maqsadına – ukrain Qırımınıñ Rusiye işğalinden azat etilmesine hızmet ete.

Zakayev Meclisnen daimiy işbirligini qayd etip, Ukrainada bulunğan birinci künü Meclis reberliginen körüşkenini ve o vaqıttan berli Ukrainada bulunğan ve topraq bütünligini qorçalağan bütün çeçenler içün qırımtatarlar dayanıqlıq temeli olğanını hatırlattı:

“Bir qaç on yıl evelsi, siziñ şimdi olğanıñız şeylerni biz de yaşadıq. Bizni dinimiz kibi birleştirgen umumiy taqdirimiz bar. Bizni vatanımızdan marum ettirmege tırışa ediler, çünki er bir halq içün eñ qıymetli şey – doğğan toprağıdır”.

İçkeriya Ükümetiniñ Reisiniñ ziyareti vaqtınca Meclis ofisindeki namaz odası içün Quran metni yazılğan divar levhasını bağışladı.

Refat Çubarov, ediyeni qabul etip, şimdi er kes, başta halqlarnı esir etip, mustaqil Çeçen İçkeriya Cumhuriyetiniñ toprağını zapt etken, şimdi ise ukrain devleti ve ukrain milletini yoq etmege tırışqan Rusiye istilâsına qarşı küreşip, umumiy iş yapqanını qayd etti ve bu levha Qırım azat etilecek soñ Qırımnıñ esas camilerinden birinde yerleştirilecek, dep iqoştı.

Taqdim merasiminden soñ subet olıp keçti, anda taraflar işbirlikniñ ilerideki planlarınen bağlı muayyen meselelerni muzakere ettiler. Körüşüvde Qırımtatar Milliy Meclisiniñ reisiniñ muavini Ahtem Çiygöz ve Meclis azası, “Qırım” hayriye fondunıñ reisi Riza Şevkiyev de iştirak ettiler.