Refat Çubarov tamır halqları meseleleri daimiy forumında çıqışta bulundı

25.04.2025

Qırımtatar Milliy Meclisiniñ reisi Refat Çubarov New Yorkta devam etken Tamır halqları meseleleri daimiy forumında çıqışta bulundı.

Adaletli halqara maliye mimarcılığınıñ meydanğa ketirilmesi mevzusında keçirilgen toplaşuvda çıqışta bulunğan Refat Çubarov, bu mesele dünya tamır halqlarınıñ bugüni ve kelecegi içün pek müim olğanını qayd etti, lâkin BMTnıñ aza devletleri tamır halqlarınıñ aqlarını körmemezlikke ursalar, adaletli halqara maliye mimarcılığı imkânsız olğanını añlamaq kerek.

“2014 senesi saban ayınıñ 20-nde, Rusiye Federatsiyası Ukrayinağa ücüm etip, Qırım Muhtar Cumhuriyetini ve Aqyar şeerini işğal etken dramatik künlerde, Ukrayina parlamenti qırımtatar halqınıñ Ukrayina devleti terkibinde aqlarınıñ kefaleti aqqında mahsus beyanatnı qabul etti. Bu beyanatnen Ukrayina devleti qırımtatar halqınıñ öz-özüni belgilev aqqını kefil etti ve tamır halqınıñ yuqarı temsil organı olğan Qırımtatar Milliy Meclisini tanıdı”, – dep Meclis reisi hatırlattı, ve qoştı ki, 2021 senesi Ukrayinada “Ukrayina tamır halqları aqqında” qanunı qabul etildi, oña köre, Ukrayina tamır halqları – asırlar devamında Ukrayina devletiniñ ayırılmaz qısmı olğan Qırım toprağında şekillengen qırımtatarlar, qaraylar, qırımçaqlardır.

Amma Rusiyeniñ Qırım işğali Ukrayina devletini bu qanunnı tolusınen yerine ketirmek imkânından marum ete, dep Çubarov qayd etti:

“Rusiyeniñ işğal etilgen Qırımdaki siyaseti, yarımadadan tamır halqınıñ çıqarılmasına doğrultılğan. Tamır qırımtatar halqına ait olğan qıymetli Qırım toprağı, Rusiye tarafından Ukrayinağa qarşı açılğan cinaiy cenkte iştirak etken Rusiye ordusınıñ arbiylerine berile. Rusiye işğal etkeni Qırımnı, diger memleketlerge qarşı ekspansiyasını arttırmaq içün qullanğan arbiy noqtasına çevire”.

Meclis reisi çıqışınıñ soñunda dedi ki, halqara maliye mimarcılığı, Rusiye Federatsiyasınıñ Qırım işğali kibi, tamır halqlarınıñ öz muqadderatını tayin etüv aqqından marum etüvden ğayrı, olarnıñ öz toprağında bar olğanlarına kerçek telüke doğurğan areketleri içün üçünci taraflarğa sert cevap berüv mehanizmlerini kirsetmeli.