Refat Çubarov, Litvaniyada Çerkes halqınıñ genotsidine bağışlanğan halqara konferentsiyada çıqışta bulundı

17.12.2025

İlk qış ayınıñ 17-nde Vilnüstaki Litvaniya Cumhuriyeti Seyminde “Tarih ve zemaneviy siyaset kontekstinde Çerkes halqınıñ genotsidi” halqara konferentsiyası olıp keçti. Anda Qırımtatar Milliy Meclisiniñ reisi Refat Çubarov da iştirak etti.

Konferentsiya, 1763-1864 seneleri çerkesler halqınıñ sessiz genotsidini, onıñ uquqiy qıymetini ve zemaneviy halqara telükesizlik içün aqibetlerini muzakere etmek içün tarihçılar, uquqçılar,, siyasetçiler ve vatandaş cemiyetiniñ vekillerini birleştirdi.

Öz çıqışında Refat Çubarov, çeşit tarihiy devirlerde tamır halqlarına qarşı kütleviy cinayetlerge ketirgen Rusiyeniñ imperatorlıq siyasetiniñ mirasını qayd etti:

“Çerkes halqınıñ genotsidini tanımaq – tek tarihiy hatıra degil. Bu halqara havfsızlıq meselesidir. Rusiye İmperiyası ve SSCBniñ cinayetleri içün cezasızlıq, Rusiye Federatsiyasınıñ Ukrayinağa qarşı bugünki tecavuzınıñ ve işğal etilgen Qırımda qırımtatar halqına qarşı repressiyalarnıñ doğrudan-doğru sebebi oldı”.

Meclis reisi, 1944 senesi mayıs ayınıñ 18-de qırımtatar halqınıñ genotsidi ve vaqtınca işğal etilgen Qırımda qırımtatarlarnıñ taqip etilüvi Moskvanıñ aynı müstemleke siyasetiniñ devamı olğanını qayd etti.

Refat Çubarov halqara toplulıqnı Rusiye imperator siyasetiniñ cinayetlerine açıq-aydın uquqiy qıymet kesmege, istilâcı devletniñ izolâtsiyasını quvetleştirmege ve esir etilgen halqlarnıñ öz-özüni tayin etüv aqqını desteklemege çağırdı.

Soñunda o, Litvaniya parlamenti ve ükümetine Ukrayina ve esir etilgen halqlarğa destek köstergenleri içün teşekkür bildirdi ve adalet, mesüliyetlik ve cezalavnıñ – insanlıqqa qarşı yañı cinayetlerniñ ögüni almaq içün yekâne yol olğanını inandırdı.