Refat Çubarov Münhendeki mitingde söz aldı

17 February 2025

Qırımtatar Milliy Meclisiniñ reisi Refat Çubarov, 2025 senesi kiçik aynıñ 15-nde Münhende, havfsızlıq konferentsiyası keçirilgen yer yanında, ukrain ve alman cemiyetiniñ Ukraina mustaqilligine qol tutuv mitinginde çıqışta bulundı.

Çubarov qayd etti ki, Rusiye-Ukraina cenki endi 11 yıl devam ete ve 2014 senesi Qırımnıñ işğalinen başlandı, dünya Rusiyege qarşı birleşip olamadı. Ve 2022 senesi kiçik aynıñ 24-nde tamam cezalarsızlıq tolu miqyaslı istilâğa yol açtı:

“Moskvanıñ 20 asırda ukrain ve qırımtatar halqlarına qarşı yapqanı cinayetler içün cezasız qalğanı kibi, bugünki künde Ukraina, ukrainler ve qırımtatarlar arasında yoq etilüv cenkine yol açtı. Şunıñ içün bütün dünya devletleri tarafından ukrainlerniñ Holodomorı ve qırımtatarlarnıñ sürgünliginiñ genotsid olaraq tanılması, tek tarihiy adaletni tiklemek içün degil, Rusiyeniñ ilerideki cinayetleriniñ ögüni almaq içün de kerekli adımdır”.

Meclisniñ reisi hatırlattı ki, Qırımnıñ 11 yıllıq işğali devamında Moskva tamır qırımtatar halqını ve Ukrainağa sadıq qalğan qavmiy ukrainlerni sert bir şekilde taqip ete. İşğalcilerniñ maqsadı – qırımtatarlarnı tuvğan toprağından terror, qanunsız tevqifler, cinaiy seferberlik, işkencenen qorqutıp çıqarmaqtır. Bugünde-bugün 233 insan, olardan üçte ekisi qırımtatrı, Rusiye repressiyalarınıñ qurbanı oldı, olarnı Qırımdan alıp kettiler ve oyun içün atıp kettiler, dedi Çubarov.

“Üç kün evel prezident Trumpnıñ diktator Putin ile telefon subeti epimizni sarsıtıp qaldırdı. AQŞnıñ bildirilgen nazar noqtası Ukraina içün qabul etilmey. Biz olmadan taqdirimizni qararlaştırmağa yol bermeycekmiz! Printsip deñişmeyip qala – Ukrainadan ğayrı Ukraina içün iç bir şey yoq! Ukraina ve qırımtatar halqı olmadan Qırım içün iç bir şey yoq!” – dep Meclisniñ reisi bildirdi.

Çubarov emin ki, Ukraina ve ukrainler birleşken Avropa halqlarınen beraber dünya doğru tarafnı saylasın dep, er şeyni yapacaqlar, ve Rusiye-Ukraina cenkiniñ bitmesini belgileycek barışıq muqavelesiniñ şartı 1991 senesi mustaqil Ukrainanıñ topraq bütünliginiñ ğayrıdan tiklenüvi olmalı, dep qayd etti.

“Rusiye, istilâcı olaraq, barışıqqa mecbur olmalı, Ukrainağa tazminat ödemeli, halqara toplulıq Rusiyeniñ esir etilgen halqlarınıñ öz muqadderatını tayin etüv aqqını desteklemeli. Putin, arbiy cinayetçi olaraq, makemege barmalı ve cezalandırılmalı”, – dep yekünledi Çubarov.