R.Çubarovnıñ fikrince yüz bergen tecavuz ve patlatuvlardan maqsad qırımtatarlar tarafından da aynı areketlerni qozğamaq

04 December 2012

Bu fikirni Qırımtatar halqı Meclisi reisiniñ birinci muavini, Qırım Yuqarı Şurasındaki “Qurultay-Ruh” fraktsiyasınıñ başı Refat Çubarov “Bir gece içinde eki provokatsiya…Qırımda kim dava çıqarmağa istey?” mevzusında keçirdigi matbuat konferentsiyasında bildirdi

Aqmescit rayonı Molodöjnoye qasabası yanındaki “narazılıq tarlası”nda muvaqqat evçiklerniñ bozuluvları, bunıñ kibi de Cuma cami qurulacaq yerniñ qaravulına tecavuz etilüvi boyunca izaat bergen Meclis reisiniñ birinci muavini Refat Çubarov şu adiseler Qırım cemaatçılığını raatsızlağanını söyledi.

“Cuma cami qurulacaq yerde patlatuvlar – musulmanlarnıñ degerlikleri, qabristan ve abidelerni aqaretlegeni içün iç te cezalanmağan şahıslarnıñ areketlerinde yañı bir şeydir, – dedi Refat Çubarov. Belli ki, qırımtatar halqınen bağlı yerlerge nisbeten yapılğan vandallıqlarnıñ teşkilâtçılarından iç bir kimse ne yaqalandı ve ne de cezalandı. Amma bu sefer er bir musulman içün aziz bir yerni qoruğan qaravulğa yandırıcı maddelernen tolu şişeler ile ücüm etildi.

“Men bu aqta cenap Aksönovğa bildirip, Molodöjnoye qasabasında aydutlıq duyğularını yeterli derecede qanaatlendirmegenler, Büyük cami qurulacaq yerde cinaiy işlerini devam ettirebilirler, dedim” – dep ayttı Refat Çubarov “Rus birligi” birleşmesiniñ başı Sergey Aksönovnen olğan subetini tariflerken. Bu birleşme “Molodöjnoye qasabasındaki adise içün mesülietni boynuna aldı. Çubarovnıñ bildirgenine köre, S. Aksönov onıñ tarafdarları cami qurulacaq yerde olğan adisede iştirak etmegen, tek Molodöjnoye qasabasındaki areketleri içün cevap bere.

“Qırımlı siyasetçilerniñ böyle pozitsiyasını şu tarzda tarif etmek mümkün, yani “er bir aydutım” belli derecede ahlâqlı insan, bir yağmadan soñ ekincisine barmaz, – dedi R. Çubarov Aksönovnıñ sözlerini izaatlap. Bes-belli bütün bu şeyler Qırımdaki siyasiy medeniyet ve diger vaqialarnı añlamamızğa bağlıdır”.

Meclis reisiniñ birinci muavini Qırımda er angi dialognıñ olmasına keder etken şahıslarnıñ areketleri Meclis ve Qırım cemaatçılığını telâşqa qoyğanını seslendirdi.

R.Çubarovnıñ fikrince yüz bergen tecavuz ve patlatuvlardan maqsad qırımtatarlar tarafından da aynı areketlerni qozğamaqtır.

“3 dekabr künü maña bir gruppa yaşlar muracaat etip, ne içün bizler 1944 senesi Qırımdan zorbalıqnen quvıp çıqarılğan dedelerimizniñ evlerini aynı böyle usulnen qaytarıp olamaymız, dep soradılar. Eger de kimlerdir mülk ya da topraq meselesini gecesi kelip çezseler, ne içün bizim aynı böyle şekilde adaletni tiklemege aqqımız yoq, deyler” – dedi siyasetçi jurnalistlerniñ ögünde çıqışta bulunırken.

Bunıñnen birge Refat Çubarov şunı da kesinliknen qayd etti ki, Milliy Meclis bunıñ kibi laf ve tahminlerni başından toqtacaq. Meclis reisiniñ birinci muavini cemiyette barışıq epsi taraflarnıñ añlaşqanları neticesinde elde etile.

Hatırlatamız ki, noyabr 30-dan dekabr 1-ge keçer gecesi Aqmescit rayonınıñ Molodöjnoye qasabası yanında “narazılıq tarlasında” qırımtatarlarnıñ muvafaqqat evçileri bozulıp, Cuma cami qurulacaq yerniñ qaravulına tecavuz etildi.