R. Çubarov: “Mogilövnıñ Halqara forum boyunca fikirini añlamaq mümkün”

15 Dekabr 2011

Qırım Nazirler şurasınıñ reisi Qırımtatar halqınıñ öz Vatanında aq-uquqlarını qorçalav, Ukrainada onıñ telükesizligi ve inkişafını teminlev boyunca halqara forum hususında böyle fikir bildirmege aqlıdır, dep izaatladı QHA informagentligine Qırımtatar halqı Meclisi reisiniñ birinci muavini, Qırım Yuqarı Şurasınıñ deputatı Refat Çubarov Qırım Nazirler şurası reisiniñ mezkür forum boyunca aytqan sözlerini.

Cümleden, dekabr 13 künü olğan matbuat konferentsiyasında Qırım ükümetiniñ başı eger Halqara forum Qırımğa para ketirecek olsa, oña qoltutmağa azır olğanını qayd etti.

“Qırım cemiyetiniñ içtimaiy-iqtisadiy problemlerini çezüv ile künde oğraşqan cumhuriyet Nazirler şurasınıñ reisi Anatoliy Mogilöv qırımtatar meselesiniñ sotsial-iqtisadiy taraflarına diqqat ayırğanını añlamaq ve aqlamaq mümkün. Çünki qırımtatarlar toplu yaşağan yüzlernen qasabalarnıñ abadanlaştırılması içün sermiya yetmey, devlet bücetinden olarnıñ yeterli miqdarda ayırılması da pek zor.”, – dedi Refat Çubarov.

 Bunıñ kibi de o, Halqara forumğa köntseptual yanaşuv planlarında “qırımtatar halqınıñ qaytuvı, yerleşüvi ve aq-uquqlarınıñ ğayrıdan tiklenilmesinen bağlı çoqtan-çoq uquqiy, siyasiy ve sotsial-iqtisadiy problemlerniñ al olunması oğrunda uquqiy ve iqtisadiy areketler planı”nıñ qabul etilmesi közde tutulğanını da ayttı.

“Aksince, yaqın yıllarda onlarnen yañı mekteplerni nasıl qurıp, biñlernen iş yerlerni nasıl açıp, yüzlernen qasabalarnı nasıl abadanlaştırıp olurmız?” – bildirdi öz firini Meclis reisiniñ muavini ve qoşumca etti: “Şunı da qayd etmekni müim, dep sayam ki, olacaq forumda qırımtatar halqınıñ qaytuvı, yerleşüvi ve uquqlarınıñ tiklenilüvinen bağlı meselelerni çezüvde Ukrainağa yardım etmek maqsadında devletler tarafından berilgen maliyeviy ve diger resurslarnı birleştirgen ve qullanılmasını nezaret etken mahsus halqara vaquf meydanğa ketirilecek”