Qurultaynıñ Teftiş komissiyası yerli meclislerge musulman cemiyetlerinen birlikte er ayda öz bücetlerini meydanğa ketirmekni tevsiye etti

26 Yanvar 2014

25-26 yanvar künleri Meclis yolbaşçıları ve idare reberleriniñ Aqmescit, Cürçi, Or-Qapu ve Aqşeyh regionlarından saylanğan Qurultay delegatları, qırımtatarlarnıñ yerli idare organları, yerli şuralarnıñ deputatları ve musulman cemiyetleriniñ reisleri ile birlikte toplaşuvları keçirildi.

Yanvar 25 künü Aqmescit rayonınıñ Rodnikovoye köyünde olıp keçken toplaşuvda Meclis reisi Refat Çubarov, onıñ muavinleri Zaur Smirnov, Ahtem Çiygoz, Nariman Celâl, Qurultay Teftiş komissiyasınıñ başı Ali Özenbaş, Meclis idareleriniñ reberleri Teyfuk Gafarov, Bekir Mamutov, Sadıh Tabah, Seydamet Yağyayev, Tasil idaresi başınıñ yardımcısı İbraim Çegertma, Meclis azaları Dinara Seytgaziyeva ve Şevket Kaybullayev, bunıñ kibi de Aluşta ve Aqmescit regional meclis reisleri Enver Arpatlı ve Lemmar Yunusov iştirak ettiler. Müftilikni Qırım musulmanları müftiyiniñ muavini Esadullah Bairov temsil etti.

Yanvar 26-da Voinka qasabasında ötkerilgen Cürçi, Or-Qapu ve Aqşeyh regionları aktiviniñ toplaşuvında Meclis reisi Refat Çubarov, muavini Zaur Smirnov, Qurultay Teftiş komissiyasınıñ başı Ali Özenbaş, Meclisniñ medeniyet, tarih ve maneviy ömür meseleleri boyunca idare başı Bekir Mamutov, Meclis azası Dinara Seytgaziyeva, Müftilikniñ din cemiyetleri işini yönetüv bölüginiñ başı Ruslan İbraimov, bunıñ kibi de Aluşta, Cürçi, Or-Qapu ve Aqşeyh regional meclislerniñ reisleri Enver Arpatlı, Refat Seyitablayev, Saniye Ametova ve Musa Bilâlov iştirak ettiler.

Adet boyunca regionlarara toaplaşuvlar duadan başladılar. Meclis reisi Refat Çubarov toplaşuvnı açarken Qırımnıñ cemi regionlarında regionlarara toplaşuvlarnı keçirüv maqsadlarını seslendirip, dialog ve fikir paylaşuv, bivasta vazifelerni eda etüvge yanaşuv üslübi regionlarda ağımdaki faaliyetni mükemmelleştirüvniñ baş printsipleri olğanını qayd etti.

O, bunıñ kibi de qayd etti ki, er bir regional meclisniñ reisi ve azası, Qurultay delegatı öz işine üst-ustten yanaşmaqtan vazgeçip, öz faaliyet planını azırlamaq ve saylavcıları ögünde esabat bermek borcludır.

Öz nevbetinde Meclis reisiniñ muavini Zaur Smirnov onıñ reberligindeki idare azırlağan qırımtatar yerli idare organlarınıñ işini sistemleştirmek içün formalar aqqında hatırlatıp, regional meclis toplaşuvlarını muntazam sürette keçirmekni ve olarğa rayon din cemiyetleriniñ vekilleri, yerli sakinler ve deputatlarnı davet etmekni tevsiye etti. “Körüşüv ve toplaşuvlar devamında biz öz faaliyetimiz planını muzakere etmek, ağımdaki meseleler ve regiondaki vaziyetni talil etmek, olarnı semereli çezmek içün konkret adımlarnı atmaq kerekmiz”, – dedi Z. Smirnov.

Bundan da ğayrı Meclis reisiniñ muavini Zaur Smirnov ve Qurultay Teftiş komissiyasınıñ başı Ali Özenbaş regional meclis azaları ve Qurultay delegatlarına Milliy Meclis idareleri erkânına kirmek ve regional meclis azaları arasından Milli Meclisniñ er bir idaresinen bağlanmaq ve işbirlik içün mesül insannı tayinlemekni tevsiye ettiler.

“Qurultay Teftiş komissiyası yerli meclislerge diniy cemiyetlernen birlikte öz bücetlerini meydanğa ketirmekni teklif ete, – dedi Ali Özenbaş toplaşuv iştirakçilerine. – Bu sizge yerli problemlerni çezmek imkânını berir, amma epsi masraflar aqqında semetdeşlerimiz ögünde muntazam sürette esabat bermege borclusıñız”.

Aynı fikirni Meclis idare yolbaşçısı Sadıh Tabah da bildirip, qırımtatar iş adamlarına bulunğan imkânlarına köre qasabalarnı abadanlaştıruv işinde semetdeşlerge yardım köstermek meselelerinde regional ve yerli meclislernen birlikte çalışmağa teklif etti.

Meclisniñ medeniyet, tarih ve maneviy ömür meseleleri boyunca reberi Bekir Mamutov emin ki, regional ve yerli meclisler, Qurultay delegatlarınıñ milliy devriy neşirlernen sıqı işbirligi qırımtatarlarnıñ ömürinde olıp keçken vaqialar, Qırımnıñ o ya da bu yerinde dünyağa kelgen meşur semetdeşler aqqında ikâye etmek imkânını berir. Bunıñ ki bi de o, toplaşuv iştirakçilerine semetdeşler arasında “Qırım” ve “Avdet” gazetalarına, “Armançık” balalar mecmuasına abune kampaniyasını keçirmege çağırdı.

Meclisniñ Qırımtatar milliy areket veteranları, cemaat teşkilâtlarınen bağlanuv idaresi reisiniñ yardımcısı Dinara Seytgaziyeva Meclisniñ semetdeşlerimizge evlerini faydalanuvğa teslim etüv meseleleri boyunca konsultatsiyalar keçirmek teşebbüsi aqqında ayttı. “Biz semetdeşlerimizge eñ az masraflarnen öz evlerine zarur vesiqalarnı almağa yardım etmege azırmız, – dedi D. Seytgaziyeva. – Bundan da ğayrı bizim idaremiz bu yardımnı milliy areket veteranlarına ve sürgünlikkke oğratılğanlarğa imtiyazlı şaraitlerde yapmağa azır”.

Toplaşuv iştirakçileri, şu cümleden Qurultay delegatları, çeşit seviyedeki şuralarnıñ deputatları, saylavcılar muzakere devamında öz vazifelerini keregi kibi eda etmegen ve semetdeşlerniñ muracaatlarına seslenmegen yerli meclis azası ya da deputatnıñ vekâletligini müddetinden evel lâğuv etmek hususında fikir bildirdiler.

Ukrainada kergin siyasiy vaziyetni ve Ukraina parlamenti tarafından yanvar 16 künü alınğan diktatorlıq qanunlarnı izaatlarken Meclis reisi Refat Çubarov semetdeşlerimizni Meclis planlaştırğan Aqmescitte yanvar 28 künü saat 12-de Ukrainada qan tökülmesini ve diktatura tesis etilmesini toqtatmaq, demokratiyağa zıt qanunlarnı lâğuv etmek ve qırımtatar halqınıñ aqlarını ğayrıdan tiklemek şiarları altında keçecek mitingge qoltutmağa çağırdı.