Qurultayınıñ Qırımtatar halqı resmiy simvolları – milliy bayraq, milliy tuğra (gerb) ve gimn aqqında qararı

22 Iyül 2012

Qırımtatar halqınıñ resmiy simvolları – milliy bayraq, milliy tuğra (gerb) ve milliy gimn aqqında
Qırımtatar halqı Qurultayınıñ qararı.

1991 senesi iyün 26-30 künleri Aqmescitte keçirilgen ve kendini 1917 senesi Qurultayınıñ devamcısı diye ilân etken 11 çağırılış Qırımtatar halqı Qurultayı, qırımtatarlarnıñ milliy devletçiligi ananelerini devam eterek 1991 senesi iyün 30 künü “Qırımtatar halqınıñ milliy bayrağı ve milliy gimni aqqında” qarar aldı:

– yuqarıdaki köşesinde altın tamğa basılğan mavı tüslü qumaç qırımtatar halqınıñ milliy bayrağı olaraq sayılsın. Bayraqnıñ keñligi 1 ve uzunlığı 2 metrdir;

– Noman Çelebicihannıñ “Ant etkenmen” eseri ise qırımtatar milliy gimni olsın.

Mezkür qarar alınğanınen qırımtatar halqınıñ resmiy simvolları – milliy bayraq ve milliy gimn – halqnıñ birligi, özgünligi, nesiller bağı ve azatlığı içün çoqasırlıq küreşini ifade etken ayırılmaz qısımları oldılar.

Qırımtatar halqınıñ resmiy simvolları – milliy bayraq ve milliy gimn devlet, halqara ve cemaat tedbirlerinde keniş qullanıla.

1991 senesi iyün 30-da 11 çağırılış Qırımtatar halqı Qurultayında tsadiqlanğan Qırımtatar halqınıñ resmiy simvolları – milliy bayraq ve milliy gimnni qullanuv tertibini devam ettirmek maqsadında U çağırılış Qurultayı qarar bere:

1. Qırımtatar halqınıñ Meclisine VI çağırılış Qırımtatar halqı Qurultayı tasdiqlaması içün:

1.1 “Qırımtatar halqınıñ gimni aqqında” nizamnı işlep, gimn sözlerini Noman Çelebicihannıñ “Ant etkenmen” şiirindekisi kibi qaldırmaq, qırımtatar halqı gimni muzıkasınıñ etalonını, onı resmiy qullanuv ve uquqiy imayesiniñ tertibini belgilemek;

1.2 “Qırımtatar halqınıñ milliy bayrağı aqqında” nizamda qırımtatarlar halqı milliy bayrağınıñ resmiy qullanıluv ve uquqiy qorçalav meselesini tertipke ketirmek;

1.3 “Qırımtatar halqı milliy tuğrası (gerbi) aqqında” nizamda qırımtatar halqı milliy tuğrasınıñ tarifi, resmiy qullanıluv ve uquqiy qoruv meselesini tertipke ketirmek.

2. Qırımtatar halqınıñ resmiy simvolları – milliy bayraq, milliy gimn ve milliy tuğranen bağlı bütün meselelerni faqat Qırımtatar halqınıñ Qurultayı çezip, olarnı deñiştirmek boyunca er angi teklifler qırımtatar halqı tarafından açıq ve kün evelden muzakere etilmegenge qadar baqılmasın.

V çağırılış Qırımtatar halqı Qurultayınıñ dörtünci sessiyasında qabul etildi .
Aqmescit. 2012 senesi iyül 22.