Qurban bayramı hayırlavı

04 November 2011

Bismillâhiʼr-rahmaniʼr-rahim!

Sayğılı müminler, aziz vatandaşlar!

Yüce Rabbimizge biñlerce şükürler olsun ki, İslâmnıñ eki büyük bayramından birisi – Qurban bayramına yetip keldik. Bu bayram musulmanlarnı bir-birlerine daa da yaqınlaştırğan, özara sevgi ve barışıqlıqnı qaviyleştirgen, zenginler fuqarelerge yardım qollarını uzatqan bayramdır.

Diniy bayramlarımız – müminler içün quvanç, özara yardımlaşuv, aqrabalıq bağları pekitilgen, bağışlav künleridir. Şunıñ içün, dört kün (noyabr 6-9) devam etecek Qurban bayramında birlik ve beraberligimizni numayış eteyik, qartlarımıznı, soy-aqrabalarımıznı, hasta ve çaresizlerni ziyaret etip, evlâtlarımıznı quvandırayıq, göñüllerini alayıq!

Mubarek Quban bayramı munasebetinen cümleñizni Qırım musulmanlarınıñ diniy idaresi ve, şahsen, öz adımdan samimiy hayırlayım, ayatıñızda bahtlı-seadetli olmañıznı tileyim!

Epimizge Qurban bayramı hayırlı ve mubarek olsun, bayram sofralarıñız bereketnen tolsun! Allah Taalâ daa nice bayramlarğa sağ-selâmet qavuşmaq nasip eylesin!

Hacı Emirali ABLAYEV,
Qırım musulmanlarınıñ müftisi.