Qırımtatarlar Stalinge bağışlanğan provokatsion sergini yıqtılar

21 December 2012

2012 senesi dekabr 21-de insanlıq tarihında eñ qanlı cellât İosif Stalin doğğanınıñ 113 yıllığına bağışlanğan sergini qırımtatarlar yıqtırdılar.

Sergi “Sut vremeni – Krım” Rusiye teşkilâtınıñ Qırım bölügi tarafından teşkil etilip, Aqmescitniñ tam merkezinde açıldı. Şu teşkilâtnıñ azası Viktor Mironov keçken-ketkenlerge malümat ve vereqalar tarqattı. Em İosif Stalin tarafından qırımtatarlarnıñ sürgün etilmesini doğru iş, dep tanığanını da qayd etti.

SSSRdeki bir çoq halqlarnıñ başına belâlar ketirgen cellâtqa bağışlanğan mezkür sergi qırımtatarlarında nefret qozğadı. Olar “Stalin ve Gitler faşistler” degen sözlernen sergini bozdılar.

Şu yerde bulunğan militsiya hadimleri bu areketlerni çetten közetip turdılar. V Mironov qırımtatarlarğa hıtap eterek, olarnıñ duyğularını añlağanını bildirdi.

Er şey qavğa-davasız bitti. Ahırzaman künü dep ilân etilgen künü iç kimse zarar körmedi. Ahır zaman tek Stalin şerefine tiklengen sergi içün keldi.