Qırımtatarlar sanki Ukraina Milliy gvardiyasınıñ saflarına kirgeni aqqındaki haber kerçek degil

24 Mart 2014

Epsi kütleviy matbuat vastalarına çeşit menbalardan alınğan er angi informatsiyanı teşkermekni rica etemiz.

Kütleviy matbuat vastalarında sanki qırımtatarlar Ukraina Milliy gvardiyasınıñ saflarına kirgeni aqqındaki haberler derc etilgeni munasebetinen Qırımtatar halqı Meclisiniñ matbuat hızmeti bildire:

1. Qırımtatarlar sanki Ukraina Milliy gvardiyasınıñ saflarına kirgeni aqqındaki haber kerçek degil

2. Meclis qırımtatarlarına silâlı qurumlarğa kirmekni tevsiye etmedi ve bu hususta iç bir türlü qarar almadı.

3. Qırımtatar halqı Meclisiniñ avalesi ve yerli cemaat teşebbüsine köre çeşit milletlerge mensüp sakinler özleri yaşağan yerlerde tertip-nizam ve tınçlıqnı teminlemek maqsadınen gece nevbetçiligini teşkilâtlandırdılar. Bu teşebbüsniñ “opolçeniyenen (haciznen)” alâqası yoqtır.

Bunıñ kibi yazılar Qırımda vaziyetniñ kerginleşmesine ve açıqtan-açıq qapa-qarşılıqqa ketirebilecegini köz ögüne alaraq, biz epsi kütleviy matbuat vastalarına çeşit menbalardan alınğan er angi informatsiyanı teşkermekni rica etemiz. Qırımtatar halqınıñ Meclisi em media vastaları, em müim vaqialarnıñ muzakeresi ve dialog qurmaq içün daima açıqtır.
 

Qırımtatar halqı Meclisiniñ matbuat hızmeti