«Qırımtatar teşkilatlarınıñ platforması»nıñ vekilleriniñ beyannamesi

10 Oktâbr 2024

_{Photo Vadym Sarakhan}

Kıyivge eki künlik iş ziyareti vaqtında qırımtatar diasporasınıñ vekilleri Ukraina Tış işleri naziri Andriy Sıbiğa ve Ukraina Yuqarı Şurasınıñ reisi Ruslan Stefançuknen körüştiler. Şu körüşüvlerde Eskişehir qırımtatar derneginiñ başı Recep Şen bunı qayd etti:

Türkiyedeki bütün Qırımtatar diaspora teşkilâtlarınıñ “Qırımtatar Teşkilâtları Platforması”nıñ vekilleri olğan bizler Ukrainada olğanımız içün pek bahtlımız ve körsetkeniñiz sıcaq musafirçenlik içün yerekten teşekkür bildiremiz.

Qırımtatar milleti keçmişte ukrayin halqınen birlikte yaşadı, ortaq duşmanlarğa qarşı birlikte küreşti. Kelecegimiz de birlikte olacaqtır. 2014 senesi epimizniñ azatlığınıñ suşmanı olğan Rusiye Ukrayinanıñ topraqlarını işğal etmege başladı, 2022 senesi de bunı cenk alına ketirdi.

Bizler, Türkiyedeki Qırımtatar diasporasınıñ vekilleri olaraq açıq ve anıq olaraq beyan etemiz.

– Dünyadaki bütün Qırımtatar diasporası kibi bizler de Qırımtatar Milliy Qurultayı tarafından saylanğan Qırımtatar Milliy Meclisini qırımtatar halqınıñ yekâne resmiy temsil organı dep tanıymız ve oña bağlımız.

– Bugünki aqsız ve uquqsız tecavuz qarşısında kesenkes Ukrayinanıñ ve qardaş ukrayin halqınıñ yanındamız. Bu cenkte Ukrayinanıñ ğalebesiniñ epimizniñ ve insanlıqnıñ ğalebesi olacağını bilemiz, bu ğalebeden bir vaqıt şube etmeymiz.

– Bizler Vatanımız Qırımnıñ, halqımızğa er türlü zulumlarnı, cinayetlerni, muaceretlerni, sürgünlerni yaşatqan imperialist Rusiyeniñ boyunduruğıastına kirgenini bir vaqıt qabul etmeymiz ve etmeycekmiz. Vatanımıznıñ Rusiye işğalinden eñ tez vaqıtta qurtulacağını bekleymiz.

– Bizler elbette eñ qısqa vaqıtta barışıqnı, bu qanlı cenkniñ toqtatılmasını talap etemiz. Lâkin “barışıq” adı astında Vatanımız Qırımnıñ şu yaki bu isim, şu yaki bu şekil astında Rusiye akimiyeti astında qaldıruvını iç bir türlü qabul etmeymiz ve etmeycekmiz.

Slava Ukrayini! Slava krımskıy tataram!